प्रधानमन्त्रीया लागि २७ गते चुनाव जुइगु

सहमतिं सरकार दयेके मफुसेंलिं बहुमतं सरकार दयेकेमाःगु प्रक्रिया कथं न्हूम्ह प्रधानमन्त्रीया लागिं आः थ्वहे माघ २७ गते च्वनीगु व्यवस्थापिका संसदय् निर्वाचन याइगु जूगु दु ।

राष्ट्रपति डा.रामवरण यादवं अन्तरिम संविधानया धारा ३८ (२) कथं बहुमतं सरकार दयेकेया लागिं सोमवाः हे इनाप यायेधुंकूगु दु ।

संसदय् दक्कले तःधंगु पार्टी नेपाली काँग्रेसं पार्टी सभापति व संसदीय दलया नेता सुशिल कोइरालायात सर्वसम्मतं प्रधानमन्त्रीया उम्मेदवार दयेकीगु कुतःजुयाच्वंगु धाःगु दु ।

संसद् सचिवालयया मूछ्याञ्जे मनोहरप्रसाद भट्टराईयात निर्वाचन अधिकृत क्वःछ्यूगु दुसा व्यवस्थापिका संसद्या बुधवाः च्वनीगु मुँज्यां थ्व चुनावी ज्याझ्वः पितबीगु धाःगु दु ।