ओलि हे जुल एमालेया संसदीय दलया नेता
नेकपा एमालेया संसदीय दलया नेता ल्ययेत मंगलवाः जूगु चुनावय् खड्ग ओलि २३ मत अप्वः हयाः त्याःगु दु । प्रतिद्वन्दी जुयादीम्ह पार्टी नायः झलनाथ खनालं ७५ मत काःगु खःसा ओलिं ९८ मत कयादीगु खः । कुल सच्छ व न्हयेस्वकू मत दुगु खःसा चुनाव त्याकेत ८७ जक मत दुसा गाःगु ख ।
खनाल पक्षय् दुम्ह पार्टी न्वकू वामदेव गौतम आकाझाकां ओलि पक्षय् वंगुलिं ओलि त्यायेत अःपुगु खः । वइगु बैशाखय् जुइगु पार्टीया गुक्वःगु महाधिवेशनय् नं ओलि हे पार्टीया नायः जुइगु कुतः यानाच्वंगु सीदुगु दु ।
चुनावय् बूसां नं चुनावी लिच्वलं एमाले त्याःगु धयादिसें नायः खनालं 'आः ओलि संसदीय दलया नेता जुयादिल, जि पार्टीया नायः। आः जिपिं निम्हं मिलेजुया पार्टीयात अझ न्ह्यज्याका वनेगु जुइ ।' थ्व चुनाव प्रक्रिया धयागु लोकतान्त्रिक अभ्यास जूगु धयादिसें संसदीय दलय् त्याकादीम्ह ओलियात पार्टीया पाखें व थःगु व्यक्तिगतपाखें नं बधाई बियादिल ।
संसदीय दलया नेताय् थः त्यायेधुंकाः चिहाकलं प्रतिक्रिया बियादिसें ओलिं धयादिल 'चुनावया लिच्वः वयेधुंकूगुलिं पक्षय् व विपक्षय् मत ब्यूपिंत आग्रह व पूर्वाग्रह तयेगु जुइमखु, मतदान सिधल, लिच्वः नं वल, आः हाकनं सकलें छथाय् हे दु । राष्ट्रिय राजनीतिइ एमालेया भूमिकाय् छतिं म्हो हयेमखु । पार्टी व संसदीय दलयात मिलेयाना छधी व प्रभावकारी यानायंकेगु जुइ ।'
