शुरु जुल वसन्त ऋतु
थ्व दँया वसन्त ऋतु मंगलवाःनिसें शुरु जूगु दु । श्रीपञ्चमि वा वसन्त पञ्चमि नं धाइगु थुगु न्हि निसें मस्तय्त आखः स्यनीगु नं शुरु याइगु खः ।
विद्या स्यनीम्ह द्यः भाःपाः सरस्वति द्यःया पुजा यासें मस्तय्त आखः च्वकाः आखः स्यनीगु परम्परा दु । मंगलवाः सरस्वति द्यः दुगुथाय् स्वयम्भु, यलया लेलेच्वंगु सरस्वतिकुण्ड, ज्ञानकुण्ड, त्रिभुवनविश्वविद्यालय, किपूया बगैचा, किपूया बःखु, आदि थासय् म्वःम्वः हे भक्तजन नं वनीगु खः ।
स्वांसिमाय् नं न्हूगु चुलि वइगु, मनूतय् नं मानसिक प्रकृति हिलीगु, शिशिर ऋतुस्वयां बिस्कंकथं फय् वइगुलिं न्हूगु हे लसक जुइगु जूगुलिं थ्व न्हियात वसन्त ऋतुया न्हापांगु न्हि कथं नं हनीगु खः । नेवाःतय् बिस्कं कथंया संगीत 'वसन्त राग' नं थ्व न्हि निसें हे हालीगु खः । अतिकं लोकं ह्वाःगु म्ये 'शिरिशिरि फसं जितः कुचुकुचु नकल ...' बोलया म्ये बसन्त रागया म्ये खः ।
थ्वहे लसताय् येँय् हनुमानध्वाखाया नासःचुकय् सुथसिया ८ ताः ईया भिं साइतय् वसन्त श्रवण ज्याझ्वः याःगु दु । राष्ट्रपति डा. रामवरण यादव उगु ज्याझ्वलय् झायादीगु खः । बाह्रौ शताब्दीया महाकवि जयदेवं च्वयादीगु गीतगोविन्दय् दुगु वसन्तया म्ये न्यंकेगु परम्परा दु ।
