न्हूगु आधारय् सहमति मालेमाः अध्यक्ष बैद्य
नेकपा–माओवादीं थःपिनिगु सहमति बिना देय्या ल्वापुया समाधान जुइमफइगु न्ह्यःथना न्हूगु आधारय् राष्ट्रिय सहमति यायेमाःगु धयादीगु दु ।
पार्टी मू ज्याकू प्यन्हुतक्क च्वंगु पोलिटब्यूरो बैठकया निर्णयत सार्वजनिक यानादिसें उगु पार्टीं सहमतिया नितिं सर्वपक्षीय राजनीतिक सभा नीस्वनाः लिच्वः पिकायेमाःगु खँय् बहः नापं ब्यूगु दु ।
पार्टी मू ज्याकुथिइ ग्वसाः ग्वःगु पत्रकार सम्मेलनय् पार्टी नायः मोहन बैद्यं जनयुद्धया मू हिस्सा थःगु पार्टी जूगुलिं थःपिंत पिनेतयाः ल्वापुया समाधान जुइमफइगु धयादीगु खः ।
वय्कलं वर्तमान संविधानसभापाखें लिच्वः पिहाँवयेमफइगु जूगुलिं आः गुकथं देय्यात लिच्वः बीगु धइगु खँ दलतय्गु ल्हातय् दुगु धयादीगु दु । नायः बैद्यं चीधंगु थीथी पार्टीतलिसे एकता जुइगु जूसां नं एकीकृत माओवादीलिसे आः हे पार्टी एकता जुइगु सम्भावना मदुगु स्पष्ट यानादीगु दु ।
नायः बैद्यं हेटौडा महाधिबेशनया कार्यदिशाय् हिउपाः हयाः समिक्षा याःसा एकीकृत माओवादीलिसे कार्यगत एकता जुइफइगु धयादीगु दु ।
नेकपा–माओवादीं सुपुर्दगी सन्धि लगायतया थीथी अध्यादेशत संसद्य् न्ह्यब्वःगुलिइ विरोध याःगु दुसा माथिल्लो कर्णाली लगायत देय्या हित अःखःया जल सम्झौता, बेरोजगार समस्या, सीमा अतिक्रमण लगायतया थीथी विषयसं केन्द्रीत जुयाः आन्दोलनया तयारी यायेगु नं जानकारी ब्यूगु खः ।
