सहमतीय सरकार दयेके मफुत, आः बहुमतीय सरकारया पाः
राष्ट्रपतिं ब्यूगु ई माघ १९ गते तक सहमतीय सरकार दयेकेत धाःगु खःसा सरकारया नेतृत्व याइम्ह नेपाली काँग्रेसया सभापति सुशिल कोइराला ताःमलात । माघ १२ गते राष्ट्रपतिं संविधानया धारा ३८ (१) कथं सहमतीया सरकार दयेकेत छवाः ई ब्यूगु खःसा व ई क्वचाये धुंकाः नं सरकार दयेके मफुगुलिं कोइराला अफसल सावित जूगु खः ।
सहमतीय सरकार दयेकेया लागि लिपांगु न्हि आइतवाः संविधानसभा भवन, न्हूबानेश्वरय् च्वंगु सर्वदलिय मुँज्याय् स्वंगूगु तःधंगु पार्टी एमाओवादी व प्यंगूगु पार्टी राप्रपा नेपालं थःपिं विपक्षय् च्वनेगु धकाः धायेवं थ्व अभ्यास ताःमलाःगु खः ।
सहमतीय सरकार दयेके मफयेवं संविधानया धारा ३८ (२) कथं बहुमतीय सरकार दयेकेगु प्रक्रिया न्ह्याई । थुकिया लागिं सोमवाः हे राष्ट्रपतिं बहुमतीय सरकार दयेकेया लागि आह्वान याइगु राजनीतिक विश्लेषकतय्सं धाःगु दु ।
एमाओवादीया नायः 'प्रचण्डं' नेपाली काँग्रेस व नेकपा एमाले जानां सरकार दयेकेत सुझाव बियादीगु दु । थःपिं चाहिं रचनात्मक प्रतिपक्षया भूमिका म्हितेगु धयादिसें जनतां काँग्रेस व एमाले जानां सरकार दयेकेत 'म्याण्डेड' ब्यूगु खः । काँग्रेस व एमाले जाःसा बहुमत नं गाः । अझ एमालेसिबें काँग्रेस तःधंगु पार्टी जूगुलिं काँग्रेसं सरकारया नेतृत्व यायेमाःगु स्वाभाबिक खनेदु । काँग्रेस व एमाले जानां सरकार दयेकी, जिमिगु भिंतुना दु, धयादीगु दु ।
एमालें घुं क्यन
काँग्रेसया नेतृत्वय् सरकार दयेकेत सहमत जूम्ह नेकपा एमालें थःपिं निगूगु तःधंगु पार्टी जूगुलिं सम्मानजनक शक्ति इनां मब्यूसा सरकारय् वनेमखु धकाः घुं क्यनादीगु दु । आइतवाःया सर्वदलिय मुँज्याय् एमाले नायः झलनाथ खनालं बहुमतीय सरकार स्वयां नं एमालें थःपिंतः पोजिसन माःगु खँ धयादीगु खः ।
