एमाओवादीं जातीय कोटा हे न्हंकीगु
विभाजित जुयाच्वंपिं नेकपा एकिकृत माओवादी व नेकपा–माओवादीं गजाःगु कम्युनिष्ट पार्टी दयेकेगु धइगु खँय् सहलह यानाच्वंगु झ्वलय् निम्हेसियां निगू हे बिचाः प्रष्ट याःगु दु ।
नेकपा–माओवादीं (बैद्य पक्षं) कम्युनिष्ट पार्टीइ प्रतिशत हे क्वःछिना जातीय कोटा तयेमाःगु खँ न्ह्यथंगु दुसा एमाओवादीं धाःसा जातीय कोटा प्रणाली हे न्हंकाः छ्वयेगु प्रस्ताव न्ह्यःनेहःगु दु । थ्व कोटा प्रणाली न्हंकाः हे छ्वयेमा धकाः प्रस्ताव हःम्ह एमाओवादीया नायः पुष्पकमल दाहाल 'प्रचण्ड' हे खः । विशेषयाना निक्वःगु संविधानसभाया निर्वाचनय् थःपिं स्वंगूगु पार्टी जूवंबलय् निसें थ्व जातीय कोटाय् विश्वास यानामहःगु खः ।
पार्टीया मू ज्याकू पेरिस डाँडा, कोटेश्वरय् जुयाच्वंगु केन्द्रीय समितिया मुँज्याय् नायः प्रचण्डं न्ह्यब्वःगु राजनीतिक प्रतिवेदनय् पार्टीया गुगुंनं निकायय् जातीय आधारय् नियुक्त मयायेगु न्ह्यथंगु खः । तर पार्टीया दुजःया परिक्षणया इलय् धाःसा उत्पीडित जातिया लागि मेमेगु जातिस्वयां म्हो जक तःगु दु ।
प्रचण्डं हःगु प्रस्ताव शनिवाः च्वनीगु केन्द्रीय समितिं पारित याःसा जातीय कोटा जक मखु जातीय आधारय् दयेकातःगु थीथी राज्य समिति नं न्हंकाः जिल्ला व गाविसया आधारय् कमिटीत दयेकी । नेवाः, लिम्बुवान, किराँत, मगरात थेंजाःगु जातीय संरचना नं स्वतः हे न्हनांवनी ।
