पुलांम्ह प्रधानन्यायाधीश उपाध्याय मन्त
२०४७ सालया संविधानया मस्यौदाकार पुलांम्ह प्रधानन्यायाधीस विश्वनाथ उपाध्याय बिहिवाः चान्हय् मन्त । न्यान्हु न्ह्यःनिसें बाँसबारीइ च्वंगु न्युरो अस्पताय् वासः याकाच्वंम्ह उपाध्याय् १२ ताः इलय् मदुगु अस्पतालं धाःगु खः ।
छेँय् अथें हे ग्वःतूसेलिं अस्पताल यंकूगु खःसा न्ह्यपुइ हि मुंगु धाःगु खः । उघ्रिमय् हे शल्यक्रिया नं याःगु खः । ८४ दँया उपाध्याय् ज्याथः जूगुलिं शल्यक्रिया यायेधुंकाः चेतना म्हो जुजुं वंगु खःसा भेन्टिलेटय् तयाःतःगु खः । सेंय् नं ल्वय् दुम्ह स्वँय् नं खराबी खनेदुगुलिं बरिष्ठ न्युरो सर्जन डा. उपेन्द्र देवकोटाया नेतृत्वया टोलीं कथुइ प्वाः खनां खै थेंजाःगु बिकार पदार्थ लिकासें शल्यक्रिया याःगु खः ।
उपाध्याय तत्कालीन प्रधानमन्त्री मनमोहन अधिकारीं विघटन याःगु संसदयात थःगु इजलासं म्वाकूगुलिं तसकं बय्बय् जूम्ह खः । लिपांगु राजनीतिक घटनाक्रमय् थःत चित्तबुझेमजूगुलिं ताःई न्ह्यःनिसें सार्वजनिक जीवनस्वयां तापाक्क च्वंनाच्वंम्ह खः । वय्कः प्रजातन्त्र पुनःस्थापनाधुंकाः म्हो जक विवादितम्ह प्रधानन्यायाधीस खः ।
मदुम्ह उपाध्याय्या सीम्हयात आः ११ ताः इलय् थःगु हे छेँ ज्ञानेश्वरय् हयेत स्वयाच्वंगु दुसा सर्वाेच्च अदालतं नं थःगु परिसरय् हयेगु कि महयेगु धइगु खँय् सहलह यानाच्वंगु दु । थौं सार्वजनिक बिदा जूगुलिं थ्व खँय् क्वःछि मफुनिगु जानकारी ब्यूगु दु । मदुम्ह उपाध्याय्या प्यम्ह काय्पिं दुसा तःधिकःम्ह काय्याथाय् च्वनाच्वंगु खः । अमेरिकाय् च्वनाच्वंपिं स्वम्ह काय्पिं मध्ये छम्ह वयेधुंकूगु व मेपिं निम्ह थ्यंकः मवःनिगु छेँजःपिंसं धाःगु दु ।
