न्हूगु सरकार माघ १९ दुने हे जुइगु
नेपाली काँग्रेसया सभापति व संसदीय दलया नेता सुशिल कोइरालां राष्ट्रपतिं बियादीगु ई दुने हे सहमतिय सरकार दयेकेगु दाबि यानादीगु दु ।
थःगु नेतृत्वय् माघ १९ गते दुने हे सहमतिय सरकार दयेकेगु लागि दलतलिसे सहलह जुयाच्वंगु नापं दक्वसितं नं पौ समेत छ्वयेधुनागु धयादिसें आपालं दलतय्सं सकारात्मक लिसः बियाहःगुलिं ई दुने हे सहमतिय सरकार दयेकेफइगु जानकारी बियादिल ।
राष्ट्रपतिं बियादीगु ई माघ १९ गते वयेत अझं स्वन्हु बांकि दनिगु धयादिसें सभापति कोइरालां थ्व ईया दुने सरकार दयेकेफइगु विश्वास प्वंकादिल । छुं गथेजुयाः सहमतिय सरकार दयेके मफत धाःसा बहुमतिय प्रक्रियाय्सां वनेमाली । देय्यात अनिर्णयया बन्दीइ दयेकातये मज्यू । याकनं स्वयां याकनं सरकार दयेका संविधान दयेकेगुलिइ केन्द्रित जुइमाः ।
पार्टीया महामन्त्री प्रकाशमान सिंहं बिहिवाः थःगु छेँय् चाक्सीबारीइ नेपाली काँग्रेसं त्याःपिं सभासद्तय्त हनेकथं ग्वसाःग्वःगु चियापान ज्याझ्वलय् पत्रकारतलिसेंया खँल्हाबल्हाय् धयादिसें सभापति कोइरालां मन्त्रीपरिषदं मनोनित यायेमाःपिं २६ म्ह सभासद्या बारे नं थ्व सरकारं छुं हे च्यूता तःगु मदुनि । थ्व सरकारं मयाःसा न्हू वइगु सरकारं मनोनयन यायेगु खँ नं पत्रकारतय्त कनादिल ।
सरकार दयेकेगुलिसें संविधान च्वयेगु लागिं नं दक्वं दलत मिलेजुयाः न्ह्याःवनेमाः व थुकिया लागि दक्व दलया नं ग्वहालि दइगु खँय् विश्वास प्वंकादिल । ज्याझ्वलय् पार्टीया वरिष्ठ नेता शेरबहादुर देउवा, महामन्त्री कृष्णप्रसाद सिटौला, नेता डा. रामशरण महत, डा.मिनेन्द्र रिजाललिसें आपालं नेता कार्यकर्तातय् ब्वति दुगु खः ।
