देसभरि हे शहिद दिवस हन
जहाँनिया राणा शासनया विरुद्धय् थःगु ज्यान तक पाना वंपिं बीर शहिदतय् लुमन्ति बिहिवाः देसभरि शहिद दिवस हनांच्वंगु दु । दँय्दसं हे माघया १० गतेनिसें १६ गते तक छवाःन्यंकः थ्व दिवस हनीगु खः ।
प्रजातन्त्रया लागि राणाशासनया विरुद्धय् नेपाल प्रजापरिषद् दयेका जनतायात थःगु हक अधिकारया लागि क्रान्ति यायेत न्ह्यच्यूपिं शुक्रराज शास्त्रीयात टेकुइ च्वंगु सिमाय् वयां स्वन्हुलिपा धर्मभक्त माथेमायात सिमलय यख्खाना स्याःगु खः । अथेहे दशरथ चन्द व गंगालाल श्रेष्ठयात माघ १५ गते शोभाभगवतिय गोलिं कयेका स्याःगु खः । थुपिं हे वीर शहिदतय्गु त्याग व बलिदानयात लुमंकुसे थ्व दिवस हनावयाच्वंगु खः । शहिद दिवसया झ्वलय् बिहिवाः सरकारं सार्वजनिक बिदा नं ब्यूगु दु ।
शहिद दिवसया झ्वलय् राष्ट्रपति रावरण यादवं लोकतान्त्रिक गणतन्त्रयात संस्थागत विकासया लागि झीपिं मदिक्क न्ह्यचिलाच्वनागु धयादिल । देसय् स्वच्छ राजनीतिक संस्कारया विकासलिसें आर्थिक, सामाजिक व सांस्कृतिक ह्यूपा यायेगु बिचाः यासें न्ह्यचिलेगु हे शहिदयात धात्थेंया श्रद्धाञ्जली जुइगु धासें राष्ट्रपति यादवं राष्ट्रया उज्ज्वल भविष्यया लागि थःगु जीवन पानावंपिं ज्ञात अज्ञात दक्वं शहिदतय्त श्रद्धाञ्जली प्वंकूगु दु ।
थुकथं हे उपराष्ट्रपति, मन्त्रीपरिषद्या नायः लिसें थीथी राजनीतिक पार्टीतय्सं नं शहिदतय्त श्रद्धाञ्जली प्वंकूगु दु ।
