किपुलिइ क्वाःचो महोत्सव
येँय् नं दक्षिण पश्चिम लागाय् च्वंगु ऐतिहासिक नगर किपुलिइ बिहिवाःनिसें 'क्वाःचो महोत्सव' जइगु जूगु दु । किपू नगरपालिका वडा नं. २ लय् लाःगु थुगु क्वाःचो ऐतिहासिक व धार्मिक महत्वं जाःगु थाय् खः । समुद्र सतह स्वयां प्यद्वः फिटं मयाक तःजाःगु थुगु क्वाचो किपूया देय्यानं च्वकाय् हे लाः ।
येँय् १० नं. क्षेत्रय् लाःगु थुगु क्वाःचो मूपाहाँ थुगु क्षेत्रया सभासद् भाजु राजन के.सी. बिहिवाः सुथसिया ११ ताः इलय् उलेज्या याइगु ग्वसाखलकं जानकारी ब्युगु दु । क्वाःचो थहांवनेथाय् लाक्क महोत्वसया हे लागि दयेकूगु न्हूगु कलात्मक ध्वाखाय् भाजु के.सीं. रिबन चानां महोत्वसया उलेज्या जुइगु ग्वसाःखलःया दिलिप महर्जनं नेपालमण्डल डटकमयात जानकारी बियादिल ।
उलेज्या ज्याझ्वलय् गुथि संस्थानया नायः भाजु पञ्चलाल महर्जनं मां ताः खनां क्वाःचोय् थहाँ वनां च्वय् दयेकातःगु दबुलिइ त्वाः थकालीं त्वाःदेवाय् मत च्याकादीसा बांकि पाहाँपिंसं बःखुँ ब्वयेकीगु ज्याझ्वः दु ।
महाद्यः व पार्वति द्यः दुगु क्वाःचो देगलय् च्वंगु भराय्ग्वःगु गं थानां बि.सं.२०४६ सालया जनआन्दोलनया इलय् किपुलिइ छुं नं ज्याझ्वःया सुचं बीगु खः । थ्व गं थातकि किपूलिसें जःखःच्वंगु प्यखेरं हे तायेदइगु खः । थ्व थासं येँ देय्लिसें प्यखेरं च्वंगु थाय् त क्वय्पाखे लाःगुलिं स्वयेबलय् न्ह्यइपुसे च्वनीगु खः । क्वाःचों थीथी हिमाल नं खनेदुसा उगु हिमाल स्वयेबलय् नं न्ह्यइपुसे च्वनीगु खः ।
महोत्वस ज्वःछि किपूया थीथी सांस्कृतिक किपा लिसें किपूया हे कलाकारपिंसं च्वयातःगु थीथी किपाःत ब्वयाःतइसा नेवाः खानाया परिकार त ब्वयातइगु जानकारी ब्यूगु दु । महोत्सवय् फुड स्टल नं दइगु लिसें थीथी कलाकारतपाखें साँस्कृतिक ज्याझ्वः त नं जुयाच्वंनिगु जानकारी ब्यूगु दु । महोत्वसय् ऐला, थ्वँ थेंजाःगु नसालु पदार्थ धाःसा निषेध यानातःगु दु ।
ऐतिहासिक नगर व पर्यटकिय थाय् जूसांतबि प्रचाारप्रसार मगाःगु हुनिं थ्व थाय्या विकास जुइ मफुगलिं पर्यटन विकास व संरक्षण संबद्र्धन यायेया लागि थ्व महोत्सवया ग्वसाःग्वयागु धाःगु दु । महोत्सव स्वन्हु (शनिवाः) तक जुइ ।
