निम्हं रथी चीकेगु प्रस्ताव
प्रमया संवोधन वयेवं संसद सुचारु जुइगु
यें (सन्ध्या टाइम्स) / अवरुद्ध जुयाच्वंगु संसदयात सुचारु यायेत व माओवादी आन्दोलनयात संवोधन यायेगु निंतिं एमालें छ्वयाहःगु प्रस्तावयात कयाः थौं च्वंगु निगुलिं पार्टीया कार्यदलया बैठक निष्कर्षविहिन जूगु दु । थौं सुथय् हे च्वंगु उगु वार्ताय् निगुलिं पक्षं थःथःगु अडान काःगुलिं वार्ता निष्कर्षहिन जूगु खः ।
सुथय्या वार्ता निष्कर्षविहिन जूसां शीर्ष नेतातय् दथुइ थौं हे हानं मेगु वार्ता यानाः समझदारी कायम यायेगु सहमति जूगु खँ माओवादी संसदीय दलया उपनेता नारायणकाजी श्रेष्ठं कनादीगु दु ।
भाषा गज्याःगु छ्यलेगु धइगु जक विवाद जूगु व शीर्ष नेतातय् बैठकं उगु विवादयात ज्यंकीगु जानकारी नं वय्कलं बियादिल ।
यदि थौं निगुलिं पार्टीया दथुइ सहलह जुयाः सहमति जुल धाःसा थौं हे प्रधानमन्त्री माधव नेपालं माओवादीं ल्ह्वनाच्वंगु नागरिक सर्वोच्चतायात कयाः सदनय् संवोधन याइगु ज्याझ्वः दयेकातःगु खः । उगु संवोधनय् यदि माओवादीं ल्ह्वनाच्वंगु फुक्कं मागयात कयाः संवोधन याना तल धाःसा माओवादीं नं थनिंनिसें हे दिनाच्वंगु संसद न्ह्याके बीगु खँ धाःगु दु । आः सदन शुरु जुल कि हे बन्द यायेगु ज्या जक जुइगु खः ।
थ्वहे झ्वलय् कार्यदलया दुजः पोष्टबहादुर बोगटीं निगू पार्टी दथुया सहलह सकारात्मक जूगु खँ धयादीगु दु ।
प्रधानसेनापति प्रकरण लिपा माओवादीं सरकार त्वःतेगुया लिसें सदन अवरुद्ध यायेगु ज्या याना वयाच्वंगु खः ।
म्हिगः निगू पार्टी दथुइ जूगु सहमति कथं सरकारं थौं छगू प्रस्ताव दयेकाः माओवादीयात क्यंगु दु । उकी प्रधानसेनापति रुक्मांगद कटवालयात बिदा बीगु रथी कूल बहादुर खड्कायात सरकारया न्ह्यागुसां छगू जिम्मेवारी बीगु व स्वंगूगु वरियताय् लानाच्वंम्ह रथी छत्रमान गुरुङयात प्रधानसेनापति दयेकेगु प्रस्ताव यानातःगु दु । यदि थ्व पारित जुल धाःसा उकियात याकनं लागू नं यायेगु खँ धाःगु दु ।
