संविधान च्वइपिंत स्वांमा क्वखायेकि : उपराष्ट्रपति झा
देसय् न्हूगु सरकार दयेकेत नेतात ब्वाँय् जुयाच्वंगु इलय् नेकपा एमालें धाःसा न्हापां राष्ट्रपतिया नि चुनाव यायेमाः धकाः धयाच्वंसां नेपाली काँग्रेसं धाःसा थ्व इलय् राष्ट्रपतिया चुनावयाना अलमल मयासें न्हापां सरकार नि दयेकेगु धकाः धयाच्वंगु इलय् उपराष्ट्रपति परमानन्द झानं धाःसा याकनं संविधान दयेका थः व राष्ट्रपतियात सम्मानजनक बिदा बीत दलतय्त इनाप यानादीगु दु ।
बाँकेया नेपालगञ्जय् बुधवाः मध्यपश्चिमाञ्चल उद्योग व्यापार एवं जडीबुटी प्रदर्शन मेला व बाँके पर्यटन महोत्सवया उलेज्या यानादीसें उपराष्ट्रपति झानं थ्व खँ धयादीगु खः । उद्योग बाणिज्य संघ बाँकेया नायः कृष्ण श्रेष्ठ व मूछ्याञ्जे विष्णु लामिछानें ५ किलोया स्वांमा क्वखायेका मूपाहाँ उपराष्ट्रपतियात लसकुस याःगु खः । 'संविधान च्वइपिंत स्वांमा क्वखायेकी, जितः मखु' धका धयादिसें उपराष्ट्रपति झां ताःई तक पदय् च्वंच्वनेगु मंमदु धयादिल ।
ज्याझ्वलय् मध्यपश्चिमया क्षेत्रीय प्रशासक इन्द्रप्रसाद उपाध्याय, उद्योगी कुमुद दुगड, नेपालगञ्ज उद्योग वाणिज्य संघया नायः कृष्णप्रसाद श्रेष्ठं थःगु नुगः खँ तयादीगु खः । माघ २६ गतेतक न्ह्याइगु थुगु महोत्सवपाखें म्हइगु दामं बहुउद्देश्यीय सभागृह दयेकेगुलिइ ग्वहालि यायेगु नायः श्रेष्ठं जानकारी बियादिल ।
