एमालें नं संसदीय दलया नेता ल्यइगु
संविधानसभाय् स्वंगू तःधंगु पार्टी मध्ये न्हपांगु व लियांल्यू लाःगु पार्टी छसिकथं नेपाली काँग्रेस व एमाओवादीं थःपिनि संसदीय दलया नेता सभापति सुशिल कोइराला व नायः प्रचण्डयात ल्ययेधुंकाः निगूगु तःधंगु पार्टी नेकपा एमालें धाःसा थःपिनि संसदीय दलया नेता अझं ल्यये फुगु मदुनि ।
बुधवाः च्वनीगु स्थायी कमिटीया मुँज्यां ल्यइगु धाःगु दु । पार्टी मूज्याकू मदननगर बल्खुइ न्हिनसिया ३ ताःइलय् च्वनी धाःगु मुँज्याय् संसदीय दलया नेता ल्ययेगु, सरकार दयेकेगु व थ्वहे बैशाखं जुइगु महाधिवेशनया विषयस सहलह जुइगु पार्टी सचिव युवराज ज्ञवाली जानकारी ब्यूगु दु ।
ज्ञवालीया कथं संसदीय दलया नेताय् सर्वसम्मति हे जुइगु धयादीगु दु । यदि सर्वसम्मति मजुलधाःसा चुनाव यानांसां ल्यइगु धयादीगु दु । संसदीय दलया नेताया लागि पार्टी नायः झलनाथ खनाल, खड्ग ओली, व न्वकू वामदेव गौतम प्रतिस्पर्धी जुइगु खनेदु । थुकिंयाना पार्टीइ दुने विवाद नं अप्वयावंगु दु ।
थ्वहे विवादंयाना संसदीय दलया नेता ल्ययेगु ज्या लिबानाच्वंगु खःसा मंगलवाः च्वंगु मुँज्यां नं थ्व बारे छुं हे खँ मजूगु धाःगु दु ।
