एमाओवादीं प्रचण्डयात हे संसदीय दलया नेता ल्यल
निक्वःगु संविधानसभाया चुनावय् अप्रत्यासित कथं स्वंगूगु पार्टी जूवंगु झोंकय् संविधानसभाय् ब्वति हे काये मखु धयाच्वंपिं एकिकृत नेकपा माओवादीं अन्ततः थःपिं संसदीय दलया नेता समेत ल्यःगु दु ।
पार्टी अध्यक्ष क. पुष्पकमल दाहाल 'प्रचण्ड'यात हे सर्वसम्मतं संसदीय दलया नेता ल्यःगु खः । मंगलवाः च्वंगु केन्द्रीय समितिया मुँज्यां प्रचण्डयात दलया नेता घोषित याःगु खः । नेपाली काँग्रेसं नं सभापति सुशिल कोइरालायात चुनाव मार्फत संसदीय दलया नेता ल्यःगु खःसा नेकपा एमालें धाःसा अझं ल्यये मफुनि । एमालेय् शिर्ष नेतातय् दथुइ प्रतिस्पर्धा जुयाच्वंगु दनि ।
मंगलवाः च्वंगु एमाओवादीया मुँज्यां पार्टीया हेटौंडा महाधिवेशनं त्याःपिं केन्द्रीय समितियात भंगयासें उगु समितियात अधिवेसन आयोजक समितिइ हिइकेगु सहमत जूगु जानकारी ब्यूगु दु । आः वइगु स्वलाया दुने संगठनात्मक अधिवेसन यासें केन्द्रीय कमिटी हाकनं दयकेगु धाःगु दु । थुकिया औपचारिक प्रस्ताव बुधवाः सुथसिया ८ ताः इलय् च्वनीगु केन्द्रीय समितिया मुँज्याय् पार्टी अध्यक्ष 'प्रचण्डं' न्ह्यब्वइगु जानकारी ब्यूगु खः ।
