कोइरालां रेयात हिन्दी भासं हे बधाई बिल
भारतया गणतन्त्र दिवसया लसताय् नेपाली कांग्रेसया सभापति सुशिल कोइरालां भारतीय राजदूतयात हिन्दी भासं हे बधाई ब्यूगु दु । आइतवाः संसदीय दलया नेताया चुनावय् थः त्यायेसातकि तप्यंक हे भारतीय राजदूतावास थ्यंकः वंम्ह सभापति कोइरालां भारतीय राजदूत रन्जित रेयात 'रिपब्लिक डे के अवसर पर आपको बहुत बहुत बधाईया' धकाः हिन्दीभासं हे धयादीगु खः । लिसलय् राजदूतं नं 'आपको भि बहुत बधाई संसदीय नेता चयन हुए के अवसरमें । और प्रधानमन्त्री के लिए भि अग्रिम शुभकामना' । कोइरालां 'ए सव आप लोगका कृपा है' धका तक नं धाःगु खः । थुकिंयाना सीदु कि नेपालय् छुं नं राजनीति ह्यूपाय् भारतया तप्यंक हे ल्हाः दु । दुतावासं ६५ क्वःगु गणतन्त्र दिवस न्यायेकाःच्वंगु खः ।
दुतावासय् नेपाःया दर्जनौं नेतातय् ब्वति दुगु खः । नेपाःया थुपिं नेतातय् ब्वति खनां दुतावासया कर्मचारी हे अजूचाःगु खः । न्हापालिपा अजाःगु ज्याझ्वः जुइबलय् थुलिमच्छि नेतात खनेदइमखु छम्ह कर्मचारीं अजूचाया धाल । साय्द याकनं सरकार दयेकीगु जूगुलिं राजदूतयात ह्ययेकः वःगु वा चाकडी याः वःगु खयेमाः । तर संसदीय दलया नेताय् बूम्ह नेपाल काँग्रेसया वरिष्ठ नेता शेरबहादुर देउवा धाःसा मथ्यं । देउवाः चुनावय् बुइसातकि तप्यंक थःगु निवास बुढानिलकण्ठय् वंगु खः । यद्दपि संविधानसभा चुनाव न्ह्यः भारतं देउवायात सःता प्रधानमन्त्री दयेका बीगु आश्वासन ब्यूगु संचार माध्ययमय् वःगु खः ।
ज्याझ्वलय् मधेशी जनअधिकार फोरम नेपालया नायः उपेन्द्र यादव, तराई मधेस लोकतान्त्रिक पार्टीया नायः महन्थ ठाकुर, सद्भावना पार्टीया नायः राजेन्द्र महत्तो, फोरम लोकतान्त्रिकया नायः विजयकुमार गच्छेदार, तराई मधेश सद्भावना पार्टीया नायः महेन्द्रराय यादव, फोरम गणतान्त्रिकया नायः राजकिशोर यादव, संघीय सद्भावना पार्टीया नायः अनिल झाःलिसें मधेशवादी दलतपाखें सभासद् जुयादीपिं सकलें नेतातय् ब्वति दुगु खः ।
