सांगीतिक यात्राय् सरोज महर्जन

छम्ह नचाम्ह मचां धिमे थाना उखें थुखें जुयाच्वनीगु इलय् विश्वप्रसिद्ध तबला बादक न्हुछेबहादुर डंगोलया मन व मचापाखें न्ह्याब्लें केन्द्रीत जुयाच्वनी । थ्व मचा सु खः ? थ्व मचायात बाजं स्यन धाःसा थ्वं प्रगति ला अवश्य याइ, अले थ्वं छुं न्हूगु कथंया हे सांगेतिक उत्माद नं हयाक्यनी । व मचा मेपिं मखुसें लःघःछेँ थँहिति क्वाः बहालय् बूम्ह संघरत्न महर्जन व धनमाया महर्जनया याकः काय् सरोज महर्जन खः । २०४८ साल माघ २४ गते बुम्ह जुयाः थौकन्हे सामाखुसिइ स्थायी कथं बसोबास यानाच्वनादीम्ह नचाम्ह ल्याय्म्ह खः सरोज महर्जन । तर वयागु संगीत लागाया लगाव व प्रतिभा धाःसा देश विदेश थ्यनाच्वंगु दु । थः तःबा धर्मरत्न मजर्हनया प्रेरणां थुगु लागाय् दुहाँझाःम्ह सरोजयात मां धनमायाया आर्थिक व नैतिक सपोर्ट अले अबु संघरत्नपाखें संघ हे फुक्कं खः धइकथं थीथी संघ संस्थाय् आवद्ध जुयाः ज्या यायेगु काइदा मिले जुयेवं धाःसा वं थः संगीतया संसारय् लाल कायेगु सुरु याःगु खः । पेशां चालक संघरत्नपाखें वयात याकः काय् धयाः गब्लें नं छेँया ज्याय् जक सीमित यानाः मतः । उकिं सरोजयात बसन्त ऋतु स्कुलया न्यागू कक्षा ब्वनाच्वंगु इलय्निसें हे धिमे स्येकेगु ह्वताः चूलात । नर्सरीनिसें एसएलसी परीक्षा तक बसन्त ऋतु स्कुलय् ब्वनाः प्लस टु अध्ययन प्राइम कलेजय् क्वचायेकाः हाल पब्लिक यूथ क्याम्पसय् बीबीएस तेश्रो वर्ष् अध्ययन यानाच्वंम्ह सरोज महर्जनं न्हुछेबहादुर डंगोल थेंज्याःम्ह बाद्य सम्राटनापंया संगतं थःगु यात्रायात अझ च्वन्ह्याकेगु ह्वताः चूलाका च्वनादीगु दु ।

न्हापां ला वय्कलं थःगु हे त्वालय् स्यंगु धिमे प्रशिक्षणय् सहभागी जुयेगु ह्वता चूलाकादीगु खः । उगु इलय् धाःसा त्वाःया धिमे गरु नानीबाबु महर्जन ज्याथापाखें वय्कः प्रशिक्षित जुयादीगु खः । धिमेया मू मू बोलत अखालय् च्वनाः स्यने धुंनेवं हे वय्कः थः थःम्हं तुं गुलिं बोलत सयेकादिल । संगीतय् मन क्वसाःम्ह महर्जन आः तकं स्कुलय् नं गब्लें अनुतीर्ण मजुनि । थःगु सांगीतिक यात्रा नापनापं अध्ययन नं निरन्तर कथं हे न्ह्यज्याका च्वनादीगु दु । थःगु पुलांगु छेँ थँहिति क्वाःबहाः च्वंम्ह गुरुं ताय्तिति जक याकेवं हे वय्कः थीथी ज्याझवलय् सहभागी जुयाः दच्छि तक धिमे थायेगु ज्याय् उखें थुखें जुइगु ज्याझवलय् सहभागी जुयादिल । उगु इलय् वहे च्यादँ झिदँ दुम्ह मचापाखे‌ हे जक सकल दर्शकतय् ध्यान केन्द्रीत जुयाच्वनी । सांगीतिक यात्राया झ्वलय् न्हुछेबहादुर डंगोलपाखें थीथी कथंया बाजं सयेकेगु ह्वताः चूलायेवं ला सरोज महर्जन वय्कःया ज्याझ्वःयाम्ह छम्ह अभिन्न अंग कथं बीरेन्द्र अन्तरराष्ट्रिय सम्मेलन केन्द्र तकं थ्यंका नेवाः अर्केष्ट्रा क्यनेगु ज्याय् ब्वति कायेगु ह्वताः चूलाकादिल । बैसं धाःसा नचाम्ह सरोजयात सुनानं उलि परिपक्व कलाकार कथं विश्वास याइमखु । तर वय्कः धिमे छगुलि जक मखु कि बासुरी, भ्वाइलेन, मादल, बेय्, पछिमा, धा बाजं व म्हुतुं पुइगु हार्मोनियमया नं पोख्त कलाकार खः । नापं विदेशी बाजं क्याजोन व जिम्बे नं थाः ।

धिमे सयेका दच्छि लिपा हे संगीत गुरु धर्म मुनिकारपाखें वय्कलं बासुरी सयेकेगु ह्वताः चूलाकादिल । नाप नापं वय्कः कक्षा ६ ब्वनाच्वंगु इलय्निसें हे थीथी थासय् बासुरी पुयाः छकः बासुरी पुचलय् ब्वति कयागुया निसः दां कमे यायेगु कथं पेसेवर बासुरी बादक कथं नं खने दयेका वल । थौं स्वयः झिदँ न्ह्यः थः झिदँ झिंनिदँ दुगु इलय् हे न्हापांखुसि निसः दां मां धनमाया महर्जनयात दुत बियेखंगुलिं थः नं कमाई दुम्ह जुल धकाः उगु विधाया लिउ लिउ हे ध्यान मग्न जुयाः जुयाच्वंम्ह महर्जनं हाल थीथी थासय् ज्याझ्वःत यानाः नीद्वः स्वीद्वः दां लय् अःपुक कमे यानाच्वनादीगु दु । परम्परागत संगीतयात नं आधुनिक समाजया अभिन्न अंग कथं हे पेशेवर रुपं परिचालन यायेगु क्षमता दयेकाच्वनादीम्ह सरोज महर्जनं वंगु दँया गुंलाया अवसरय् निसः व झिंन्याम्ह कलाकार सहभागी जुयाः न्हूछेबहादुर डंगोलया नेतृत्वय् भगवानपाउ स्वयम्भुया त्वाथलय् नेवाः आर्केष्ट्रा प्रस्तुत यायेखंगु गब्लें ल्वमंके मफइगु गौरवपुर्ण घटना कथं नालेगु यानाच्वंगु दु । थः अध्यक्ष जुयाच्वनादीगु लिधंसा पुचःपाखें न्ह्यब्वःगु उगु नेवाः अर्केष्ट्राय् नीन्याथि थीथी बाजं सहित मिस्त व मिजंत यानाः च्यादँनिसें ख्वीन्यादँ बैस तकया न्हूपिं पुलांपिं कलाकारत दुथ्यागु खः । उगु प्रस्तुतियात सगरमाथा टेलिभिजनं विशेष महत्व बिया बारम्बार प्रशारण याःगु खः ।

मचाबलय् निसः दां कमे यायेखंगु हे संगीत ख्यलय् दुहाँ वनेत हौसला प्राप्त जूगु घटना कथं कयादीम्ह सरोज महर्जनं थीथी नेवाः जात्राय् नं सहभागी जुयाः बाजं धायेगु यानादिल । अथेहे नक्सालया वन्जला रेष्टुरेण्टय् निदँ तक थीथी सांगीतिक ज्याझ्वः न्ह्यब्वयादिल । नापनापं मेमेगु बाजंत धमाधम स्येकेगु यानाच्वनादिल । अन नेवाः प्याखं, दि प्याखं, धिमे प्याखं व थीथी सांगीतिक ज्याझ्वलय् थीथी कथं नं वय्कः ब्वति कायेगु ह्वताः चूलाकादिल । रेष्टुरेण्टय् हे जुइगु ज्याझ्वलय् पुलुकिसि प्याखं, म्हेखा प्याखं व लाखे प्याखंया नं ब्यवस्थापनया तकं जिम्मेवारी क्वबियाच्वनादिल । चमति नेवाः खलःपाखें प्रज्ञा भवनय् न्ह्यब्वःगु सांगीतिक ज्याझ्वलय् जापानी मिसा मिका सुन्दरीपाखें न्ह्यब्वःगु नेवाः म्ये 'जिगु थ्व मन..' बोलया म्ये प्रस्तुत जूगु इलय् वय्कः धिमे थानाः व अन हे न्ह्यब्वःगु 'गुरुमापा' प्याखंया मचा पात्र जुयाः अभिनय लागाय् नं ल्हाः तयादिल । उगु फुक्कं ज्याझ्वः संगीत गुरु न्हुछेबहादुर डंगोलं एरेन्ज यानादीगु खः । आः वयाः लिधंसा संगीत तथा प्रशिक्षण केन्द्र नांगु संस्था हे दर्ता यानाः सरोज डंगोल पेसेवर बाध्य गुरु जुयाः धिमे व बासुरीया नियमित तामिल बियेगु ज्याय् लगे जुयाच्वनादीगु दु । संगीत यात्राया झ्वलय् प्यदँ न्ह्यः दक्षिणकालीइ ग्वसाग्वःगु स्वनिगःब्यापी नेवाः बासरी बाजं धेंधेंबल्ला कासाय् नासः सृष्टि कलापाखें थः नं सहभागी जुयाः कासाय् दुथ्यानाः न्हाप सिरपा लाकाः लुमिन्ति चिं कायेखंगु वय्कःया छगु मेगु अविस्मरणीय घटना जुयाच्वंगु दु । आः नकतिनि नासः सृष्टि कलापाखें नं बासरी धेंधेंबल्लाय् लिधंसा संगीत प्रशिक्षण केन्द्र न्हाप लाकाः न्यय्द्वः तका दां सिरपा त्याकादिल ।

आधुनिक सगीत विधाय् नं ल्हाः तयादीम्ह सरोज महर्जनं थःगु हे कथं ब्याण्ड नं स्थापना यानादिल । मुक्कं संगीत जक न्ह्यब्वयेगु कथं नीस्वंगु उगु आधुनिक ब्याण्डया नां नं पृथक धकाः हे तयादीगु दु । नेपाली संगीतयात आधुनिकीकरण यानाः नेपाःया नां भारतय् तकं दुथ्याकेगु ज्याय् थुगु ब्याण्ड ताःलागु दु । वय्कः उगु ब्याण्ड नापं वंगु दँय् सतपालजी महाराजया विशेष प्रवचनया झ्वलय् जूगु संगीत ज्याझ्वलय् भारतया हरिद्वार तकं थ्यंकादिल । २ लाख स्वयां अप्वः दर्शन सहभागी जूगु उगु ज्याझ्वः भारतया प्रसिद्ध धार्मिक च्यानल आजतकपाखें प्रत्यक्ष प्रशारण नं याःगु खः । पेशेवर कथं संगीत लागाय् संलग्न जुयाच्वंसां वय्कलं थीथी इलय् सितिकं नं संगीत ज्याझ्वः न्ह्यब्वयेगु यानाच्वनादीगु दु । 'सार नेपाल' नांगु ज्याथ जिथिपिंत समर्पित संस्थाया ग्वाहालिया निंतिं वंग असार १५ या धौबजी ज्याझ्वलय् वय्कःपिसं सितिकं संगीत न्ह्यब्वयेज्या नं जूगु दु । अथेहे भगवान पाउलय् जूगु उगु तःजिगु नेवाः अर्केष्ट्रा नं विदेशी डोनरतय्के ग्वाहालि मकायेगु कथं चले यानातःगु 'टेवा' नांगु मिस्तय्गु संस्थायात तेवाः बियेत याःगु खः । लिधंसा पुचलय् स्वम्ह टेवाःया स्वयम सेवकत नं दुथ्यानाच्वंगुलिं थुगु माहोल तयार जूगु खः । अन धाःसा लेटर पाइड व बक्सा तया दां नं मुकूगु खः ।

सरोज महर्जनं नेवाः देय् दबूपाखें न्ह्याकूगु लच्छि तकया बासुरी प्रशिक्षणय् नं प्रशिक्षक जुयाः ज्या यानादिल । दःगु छेँ टेकुइ निरन्तर थःगु प्रशिक्षण कक्षा चले यानाच्वनादीम्ह प्रशिक्षक सरोज महर्जन हाल स्याङ्जा जिल्लाया विकट लागा क्याक्मी गाविसया दग्दीइ च्वनाः अनया मानन्धर नेवाः समुदाययात धिमे व बासुरीया प्रभावकारी प्रशिक्षणय् सहभागी जुयाच्वनादीगु दु । स्पाइट ब्याण्ड च्यालेन्जया फष्ट वीनर अनुप्रष्ट ब्याण्डय् तकं दुथ्याना ठमेलया थीथी होटेल रेष्टुरेण्टय् बासुरी बादनय् दुथ्यानाच्वनादीम्ह महर्जनं बासुरीयात नेवाः ख्यः नापं थीथी थासय् तकं प्रचार यायेगु ज्याय् अझ भविश्यय् निरन्तर ज्या यायेगु मति तयादीगु दु । नासः सृष्टिकलापाखे फर्पिङय् न्हाप लाःगु व केन्द्रीय मानन्धर संघपाखें जूगु बेय् कासाय् चिग्वः धिमे पुचःपाखें ब्वति कयाः लिया लिउ सिरपाः त्याकाः हाल केन्द्रीय मानन्धर संघया ग्वसालय् न्ह्यानाच्वंगु प्रशिक्षणय् प्रशिक्षक जुयाच्वनादीम्ह सरोज पोखरा, लुम्विनी, धरान, धनकुटा, नारायणगढ, मुग्लीन बजार नापं देय्या थीथी थासय् सांगीतिक यात्राया झवलय् थ्यंके धुंकूम्ह ल्याय्म्ह प्रतिभा खः ।