माघ १९ गते दुने सरकार दयेकि : राष्ट्रपति यादव
मंसीर ४ गते संविधानसभाया निर्वाचन सिधयेका संविधानसभाया मुँज्या व आइतवाः निसें हे व्यवस्थापिका संसद्या मुँज्या नं न्ह्याये धुंकूगुलिं राष्ट्रपति रामवरण यादवं सरकार दयेकेत दक्वं राजनीतिक पार्टीतय्त इनाप यानादीगु दु ।
संसद् न्ह्याःगु न्हापांगु न्हि आइतवाः हे राष्ट्रपति ज्याकुथिं छगू विज्ञप्ति जारी यासें अन्तरिम संविधानया धारा ३८ या उपधारा १ बमोजिम थ्वहे माघ १९ गते दुने राजनीतिक सहमतिया आधारय् सरकार दयेकेत इनाप यानादीगु खः । सहमतिया आधारय् यदि सरकार दयेके मफइगु जुलधाःसा बहुमतीय प्रणाली सरकार दयेकेत राष्ट्रपतिं इनाप याइ । लुमंकेबहःजू १९६ सीट त्याका दक्कले तःधंगु पार्टी जुइत ताःलाःगु नेपाली काँग्रेसं आइतवाः हे थःपिनि संसदीय दलया नेता चुनाव मार्फत ल्यःगु दुसा वरिष्ठ नेता शेरबहादुर देउवायात १६ गू भोटं सभापति सुशिल कोइराला त्याःगु खः ।
तःधंगु पार्टीया ल्याखं नेपाली काँग्रेसया नेतृत्वय् सरकार दयेकीगु निश्चित दुसा प्रधानमन्त्री नं सुशील कोइराला हे जुइगु नं निश्चित दु । कोइरालाया नेतृत्वय् संसद्य् ब्वति कयादीपिं थीथी राजनीतिक दलत जाना मन्त्रीपरिषद दयेकीगु जूगु दु ।
