कोइराला 'प्रधानमन्त्री' जुइगु पक्का
नेपाली काँग्रेसया सभापति सुशिल कोइराला प्रधानमन्त्री जुइगु पक्का धैथें जूगु दु । १९६ सीट त्यानां दक्कले तःधंगु पार्टी जुइत ताःलाःगु पार्टी काँग्रेसं थःगु नेतृत्वय् सरकार गठन याइगु जूगुलिं उगु सरकारय् सु प्रधानमन्त्री जुइगु धइगु खँय् काँग्रेस दुने यक्व विवाद त पिहाँ वयाच्वंगु खः ।
काँग्रेसया विधान कथं थःगु नेतृत्वय् सरकार गठन जुल धाःसा संसदीय दलया नेता हे प्रधानमन्त्री जुइगु खः । उकिं हे थ्व पालय् संसदीय दलया नेता जुइत सभापति सुशिल कोइराला, उपसभापति रामचन्द्र पौडेल अले वरिष्ठ नेता शेरबहादुर देउवा दथुइ स्वंगू पक्ष प्रतिस्पर्धा खनेदुगु खः ।
उपसभापति पौडेलयात कोइरालां थः संसदीय दलया नेता जुया प्रधानमन्त्री जुइखन धाःसा कार्यवाहक सभापति बी धका आश्वासन बीवं पौडेलं थःगु नां लितकयाः कोइरालायात समर्थन यानादीगु खः । कोइरालां देउवायात पार्टीया जिम्मेवारी (कार्यवाहक सभापति) नं मबीगु जुसेंलि विधिवत रुपं संसदीय दलया लागिं चुनाव ल्वायेगु क्वःछ्यूगु खः ।
आइतवाः जूगु संसदीय दलया चुनावय् सभापति कोइराला १०५ मत हया त्याःगु दु । प्रतिद्वन्दी जुयादीम्ह वरिष्ठ नेता देउवां मुक्कं ८९ मत जक कयादीगु खः । १९६ मध्ये सभापति कोइराला व देउवा निथासं त्याःगु जूगुलिं वय्कःपिनिगु छकू छकू जक भोत वःगु खः । बिद्युतिय मेसिनपाखें चुनाव याःगु खःसा दथुइलाक भोट कुर्कलंनं मेसिन मक्यंगुलिं छझाः विवाद नं पिदंगु खः । १६ गू भोट कुर्के धुंकाः १७ गू भोट कुर्कूसां नं मेसिनं धाःसा १६ जक क्यनाच्वंगुलिं विवाद पिदंगु खः । विद्युतिय मतदानया लागि शनिवाः हे सकलें सभासद् तयत अभ्यास नं याकूगु खः ।
संसदीय दलया नेता ल्ययेगुलिइ बुइवं प्रधानमन्त्री वा पार्टीया कार्यबाहक सभापति जुइगु खँय् ब्वाँय् जुयाच्वंम्ह वरिष्ठ नेता देउवा पिनेलाःगु दुसा उपसभाति रामचन्द्र पौडेल कार्यवाहक सभापति जुइगु निश्चित जूगु दु ।
