पुलांपिं विद्यार्थीपिंसं सामाजिक ज्या याइगु
कीर्तिपुर माध्यामिक विद्यालय, किपूया २०४९ साल एसएलसी ब्याचया विद्यार्थीतयसं थीथी सामाजिक ज्या यानावनेगु खँ धाःगु दु । आउटलुक इन होटल, मातातिर्थय् शनिवाः जूगु विद्यार्थीतय् मुँज्यां थ्व खँ क्वःछ्यूगु खः ।
मुँज्याय् २१ दँ न्ह्यःया ब्वनेकुथिया लकस लुमंकूसें थौंया इलय् तकया थःथःगु अनुभव नं कनेज्या जूगु खः । ज्याझ्वलय् छगू कमिटी नं गठन याःगु दुसा उगु कमिटीं नियमत बचत नं यायां वनेगु व थःगु ब्याचया पासापिनि दथुइ वइगु समस्यायात फक्व ज्यंकेगु लिसें थीथी सामाजिक ज्या त यानावनेगु खँ जूगु खः ।
रविन्द्र महर्जन, रिना महर्जन, ज्ञान महर्जन, शर्मिला महर्जन, समिता श्रेष्ठ राउत, सुरेश महर्जन व सुद्धिश्वर महर्जन दुथ्याःगु उगु कमिटीं थःगु ब्याचया दक्वं पासापिंत नं थुगु कमिटी दुथ्याकेगु, थीथी तालिम त न्ह्याकेगु, ब्वनेकुथियात नं ग्वहाली जुइगु ज्याझ्वःत यानां वनेगु, मिखा सम्बन्धि निःशुल्क शिविर त न्ह्याका वनेगु खँ धाःगु दु । मुँज्याय् २० म्हेसिनं ब्वति काःगु खः ।
