थनिंनिसे शहिद सप्ताह न्ह्यात
दँय्दसं थें थुगुसी नं शुक्रवाःनिसें शहिद सप्ताह हंगु दु । शहिद सप्ताहया न्हापांगु न्हि शुक्रवा शहिद शुक्राराज शास्त्रीया टेकुइ च्वंगु झ्वाताय् स्वांमा क्वखायेका श्रद्धाञ्जली देछाःगु खः ।
बि.सं. १९९७ सालय् तत्कालिन जहानियाँ राणा शासकतय्सं थीथी राजनीतिक ज्याझ्वः न्ह्याकूगु द्वपनय् माघ १० गते शास्त्रीयात टेकुइच्वंगु सिमाय् यक्खाना मृत्युदण्ड ब्यूगु खः ।
येँ महानगरपालिकां ग्वसाःग्वःगु ज्याझ्वलय् महानगरपालिकाया कार्यकारी अधिकृत लक्ष्मण अर्यालं देशय् प्रजातान्त्रिक व्यवस्था स्थापित यासें जनताया अधिकारयात ल्यंकातयेत वय्कलं यानादीगु योगदानया सम्मान यासें देशय् जनउत्तरदायी सरकार व लोकतान्त्रिक शासन व्यवस्था न्ह्याकेमाःगु धयादिल ।
ज्याझ्वलय् महानगरपालिकाया थीथी कर्मचारी, स्थानीय मनूत व थीथी राजनीतिक नेता कार्यकर्तातय्गु ब्वति दुगु खः ।
