कानुन व तिथि क्वःछ्यूसा बैशाखं स्थानीय चुनाव

संसद् न्ह्याये धुंकूगु अवस्थाय् आः याकनं न्हूगु सरकार दयेकल व व सरकारं थ्वहे फागुणया दुने कानून दयेका तिथि क्वःछयूसा बैशाखं हे स्थानीय चुनाव याये फुगु निर्वाचन आयुक्त निलकण्ठ उप्रेती धयादीगु दु ।

दक्व हे पार्टीतय्सं थःगु घोषणपतिइ संविधानसभाया चुनाव जूगु खुलाया दुने स्थानीय निकायया चुनाव यायेगु खँय् प्रतिवद्धता प्वंकाःतःगुलिं प्रमुख आयुक्तं थ्व तिथि क्वःछीमाःगु खँय् बःब्यूगु खः ।

न्यादँय् छकः स्थानीय चुनाव जुइमाःगु खःसां वंगु २०५४ सालय् जूगु स्थानीय चुनाव धुंकाः आःतक जूगु मदुनि । जनप्रतिनिधि मदुगुलिं थौंकन्हय् नेपाल सरकारया कर्मचारीं हे दक्वं स्थानीय प्रशासन न्ह्याकाच्वंगु खः ।

ऐन संशोधन मस्यौदा तयार
स्थानीय विकास मन्त्रालयं स्थानीय स्वायत्त शासन ऐन २०५५ या न्हापांगु संशोधन मस्यौदा तयार याःगु दु । वंगु फागुणय् हे दक्वं दलतय् दथुइ जूगु ११ गू बुँदे सहमतिइ थ्वहे चैत दुने स्थानीय निकायया चुनाव यायेगु खँ जूगुलिं थ्व मस्यौदा तयार यानागु धाःगु दु ।