अनसन च्वंम्ह प्रा.डा.के.सी.तच्वः, सरकारी टोली बहनीहे अस्पतालय्
त्रिभुवन विश्वविद्यालय चिकित्साशास्त्र अध्ययन संस्थानयात स्वायत्त दयेकेमाःगु, निजि कलेजयात सम्बन्धन बीगु पूवंक दिकेमाःगु, राजिनामा बियादीम्ह डिन डा. प्रकाश साय्मियात लितसःता न्हू नियुक्त जुयादीम्ह डिन डा. शशी शर्मायात चीकेमाःगु लिसें त्रिविविइ राजनीतिक भागबन्दाया विरुद्धय् आमरण अनसन च्वनाच्वंम्ह शिक्षण अस्पतालया प्रा.डा. गोविन्द के.सी.या स्वास्थ्य झनझन स्यनावंगु दुसा बिहिवाः सनिलय् तच्वः हे जूगु दु ।
वय्कःया माग कथं बुधवाः हे डा. शशी शर्मायात डिन पदं बरखास्त याःगु खःसां थःगु माग अझं पूमवंगु व हाकनं हाकनं अनसन च्वनेम्वालेमाः धकाः आः च्वनाच्वंगु अनसन मत्वःतूम्ह प्रा.डा. के.सी.या स्वास्थ्य स्यनावंगु खः ।
१३ न्ह्यःनिसें छुं हे मनसे आमरन अनसन च्वनाच्वंगुलिं म्हयात माःगु फोस्फोरस, सोडियम पोटासियम, जिन्क, म्याग्नेसियम थेंजाःगु तत्वत म्हो जुजुं वंगुलिं वय्कःया स्वास्थ्य अथे स्यनावंगु वय्कःयात बिचाःयानाच्वंम्ह डा.राजेन्द्र वाग्लें जानकारी ब्यूगु खः ।
उघ्रिमय् हे वय्कःयात आइसियूस यंकेत स्वःगु खःसा आइसियू खाली मदुगुलिं यंके मखंगु चिकित्सक संघया पुलांम्ह नायः केदारनरसिंह के.सीं. जानकारी ब्यूगु खः । लिपा छुंभतिचा स्वास्थ्य सुधार जुइवं डा.के.सी. थःहे मानेमजूगु नं जानकारी ब्यूगु खः । सामान्य बिरामीतय्त प्रतिमिनेत २ लिटरया ल्याखं अक्सिजन बीगु याइगु खःसा आः प्रा.डा.के.सी.यात प्रतिमिनेट ४ लिटरया ल्याखं अक्सिजन बियातःगु दु । लिसें बिहिवाः निसें हे सिनियर फिजिसियन दिब्या सिंहया निगरानीइ २४ सै घण्टा खटेजुयाच्वंगु दु ।
थ्वहे दथुइ सचिव कृष्णहरि बाँस्कोटाया कजिसुइ दयेकूगु सरकारी टोली बिहिवाः बहनी हे शिक्षण अस्पताल वंगु दु ।
News Location:
