अन्ततः डिन शर्मा बरखास्त, अनसन धाःसा अझं यथावत
त्रिभुवन विश्वविद्यालय चिकित्साशास्त्र अध्ययन संस्थानयात स्वायत्त दयेकेमाःगु, निजि कलेजयात सम्बन्धन बीगु पूवंक दिकेमाःगु, राजिनामा बियादीम्ह डिन डा. प्रकाश साय्मियात लितसःताः न्हू नियुक्त जुयादीम्ह डिन डा. शशी शर्मायात चीकेमाःगु लिसें थीथी न्हय्गू माग तया प्रा.डा. गोविन्द के.सी. वंगु १२ न्ह्यःनिसें आमरण अनसन च्वनाच्वंगु खः । वय्कःया स्वास्थ्य झनझन स्यनावंगुलिं मन्त्रीपरिषद्या नायः खिलराज रेग्मी मंगलवाः प्रा.डा. के.सी.यात नापलाना अनसन त्वाःथलेत इनाप यानादीगु खः । प्रा.डा. के.सीं. त्रिविविं आधिकारिक निर्णय मयाःतले गुंनं हालतय् अनसन त्वाःथले मखु धकाः लिसः बियादीगु खःसा उघ्रिमय् हे मन्त्रीपरिषद्या नायः रेग्मीं त्रिविवियात डिन नियुक्त जुयादीम्ह डा. शर्मायात चीका उकिया २४ घौया दुने जानकारी बीत उजं ब्यूगु खः ।
त्रिविवि कार्यकारी परिषदं बुधवाः हे त्रिभुवन विश्वविद्यालय शिक्षण अस्पताल चिकित्साशास्त्र अध्ययन संस्थानया डिन डा. शशी शर्मायात बर्खास्त यायेगु निर्णय याःगु खः । कार्यकारी परिषद्या उगु निर्णय मन्त्रीपरिषद्या नायः खिलराज रेग्मीयात जानकारी ब्यूगु खः ।
त्रिविविया उपकूलपति डा. हिराबहादुर महर्जनया ल्हाःचिं दुगु उगु पतिइ २०७० माघ ८ गतेनिसें हे लागु जुइकथं डा.शर्मायात डिन पदं चीकागु उल्लेख यानातःगु दु ।
अनसन च्वंच्वंम्ह प्रा.डा. के.सी.या समर्थनय् देय्न्यंकया अस्पतालय् स्वास्थ्य सेवाय् प्रभावित जुयाच्वंगु दुसा आन्दोलनरत चिकित्सकतय्सं धाःसा थ्व निर्णयं थःपिनिगु माग आंशिक जक जूगु धासें पूमवंगु धाःगु दु । आन्दोलनयानाच्वंपिं चिकित्सकतय्त प्यखेरं आलोचना वःगुलिं माग पूमवंतले स्वास्थ्य सेवा सुचार यायेया लागि बिहिवाःनिसें चकंदबुलिइ च्वनाः स्वास्थ्य क्याम्प यायेगु धाःगु दु ।
अनसनरत प्रा.डा.के.सीं. नं थःगु आमरण अनसन मदिकेगु धाःगु दु । के.सीं निवर्तमान डिन डा. प्रकाश साय्मियाततुं पुनर्वहाली यायेमाःगु यदि डा.साय्मि मानेमजूसा वरिष्ठताया आधारय् न्हूम्ह डिन नियुक्त यायेमाःगु न्ह्यथंगु दु ।
