सहायक डिनसमेतया मंकाः राजिनामा
डिनया नियुक्ति निस्क्रिय यायेत कूलपतिया उजं
वंगू वालंनिसें आमरण अनसन च्वंच्वनाच्वंम्ह त्रिविवि चिकित्साशास्त्र अध्ययन संस्थान शिक्षण अस्पतालया प्रा.डा. गोविन्द के.सी.या मागयात सुंनं सम्बन्धित निकायं वास्ता मयाःगु हुनिं संस्थानया पदाधिकारी व शिक्षण अस्पतालया वरिष्ठ चिकित्सकतय्सं मंकाः राजिनामा याःगु दु । मंकाः राजिनामाय् थ्यंमथ्यं सच्छिम्हेसिया ल्हाःचिं दु ।
राजिनामा पतिइ अस्पतालया वरिष्ठ प्रा.डा.के.सी.वंगु वालंनिसें अनसन च्वंच्वनाच्वंगु व वय्कःया स्वास्थ्य न्हियान्हिथं स्यानावंसां नं छुंनं निकायं उकियात वास्ता मयाःगु हुनिं थथे मंकाः राजिनामा बियागु त्रिविविया उपकूलपति डा.हिराबहादुर महर्जनयात सम्बोधनयासें न्ह्यथनातःगु दु ।
अस्पतालया निर्देशक भगवान कोइरालां नं राजिनामा बीगु धाःगु खःसां ल्हाःचिं धाःसा मतःनि । त्रिविवि चिकित्साशास्त्र अध्ययन संस्थानया प्यम्ह सहायक डिन, क्याम्पस प्रमुख व सहायक क्याम्पस प्रमुखं राजिनमा पतिइ ल्हाःचिं तःगु सहायक डिन बिमल सिन्हां जानकारी ब्यूगु दु । थ्व राजिनमा पौ डिन ज्याकू मार्फत उपकूलपतिया ज्याकुथि छ्वइगु धाःगु दु ।
थ्वहे दथुई मंगलवाः मन्त्रीपरिषद्या नायः लिसें त्रिविविया कूलपति खिलराज रेग्मीं चिकित्साशास्त्र अध्ययन संस्थानया डिन डा. शशी शर्माया नियुक्ति निस्क्रिय यासें उकीया लिसः २४ घौया दुने बियादीत उपकूलपति डा. हिराबहादुर महर्जनयात निर्देशन ब्यूगु दु ।
News Location:
