स्वास्थ्य सेवाय् हड्ताल दिकेत सर्वोच्चया आदेश
सर्वोच्च अदालतं देय्या दक्वं अस्पतालं स्वास्थ्य सेवाय् हड्ताल मयासें सेवा बीत अन्तरिम आदेश ब्यूगु दु । थ्व आदेश जूगु घौछिलिपां हे थ्व सेवा सुचार यायेत धाःगु दु ।
न्यायाधीस प्रकाश वस्तीया एकल इजलासं स्वास्थ्य सेवा कायेगु नागरिकया नैसर्गिक अधिकार धासें त्रिविवि शिक्षण अस्पताल, वीर अस्पताल व वीपि कोइराला स्वास्थ्य विज्ञान प्रतिष्ठानसहितया अस्पतालया सेवा सुचारु यायेत सोमवाः न्हिनय् थथे अन्तरिम आदेश ब्यूगु खः । अत्यावश्यकीय सेवा ऐनया दफा १ या १ कथं सरकारं अत्यावश्यक सेवाय् हड्ताल याये मदइकथं राजपत्रय् सुचं पिथनातःगु समेत आदेशय् उल्लेख यानातःगु दु ।
डाक्टरपिंसं अस्पतालया आकस्मिक बाहेकया सेवा दिकूगुलिं अत्यावश्यकीय सेवा ऐन अःखः जूगु धासें उपभोक्ता हित संरक्षण मञ्चया ज्योति बाँनिया व अधिवक्ता सुनिल रंजन सिंहं सर्वोच्चय् रिट दायर याःगु खः ।
त्रिभुवन विश्वविद्यालय चिकित्साशास्त्र अध्ययन संस्थान शिक्षण अस्पतालया प्रा.डा. गोविन्द के.सीं वंगु गुन्हु न्ह्यःनिसें आमरण अनसन च्वनाच्वंगुया समर्थनय् सरकारी व निजी अस्पतालया डाक्टरपिंसं आकस्किम बाहेकया सेवा दिकूगु खः । प्रा.डा.के.सी. त्रिविवि चिकित्साशास्त्र अध्ययन संस्थानया डिन प्रकाश सायमिया राजिनामा लितकायेमाःगु व न्हूम्ह डिन जुयादीम्ह शशी शर्मायात चीकेमाःगु लिसें थीथी न्हय्गू माग तसें आमरण अनसन च्वनादीगु खः। वय्कःया स्वास्थ्य झनझन स्यनावनाच्वंगु दुसा आः वय्कयात आइसियूस तया वासः यानाच्वंगु दु ।
थ्व समस्याया समाधान यायेत शिक्षामन्त्री माधव पौडेलं त्रिविविया उपकूलपति डा.हिराबहादुर महर्जनयात न्हूम्ह डिनयात लितसःता पुलांम्ह डिन सायमियात हे हयेत उजं ब्यूगु खःसा उपकूलपतिं धाःसा शिक्षामन्त्रीया उजं मानेयाये मफइगु धयादीगु दु ।
प्यदँया लागिं न्हू नियुक्त जुयादीम्ह डिन शर्मा थःम्हहे राजिनामा ब्यूसा बाहेक मेकथं वय्कःयात चीके फइमखु धयादिसें उपकूलपति महर्जनं बरु प्रा.डा. के.सी. अनसन त्वःता वार्ताय् वयेत इनाप यानादिल ।
News Location:
