थकालीम्ह सभासद् थापापाखें सपथ ग्रहण
संविधानसभाया मुँज्या बुधबार
निक्वःगु संविधानसभाया ज्या औपचारिक रुपं न्ह्याःगु दु । संविधानसभाय् थकालीम्ह सभासद् जुयादीम्ह राप्रपाया नायः सूर्यबहादुर थापां सोमवाः थकालीम्ह सभासद्या रुपय् सपथ ग्रहण यानादीगु खः ।
राष्ट्रपति भवन शीतल निवासय् सोमवाः जूगु विशेष ज्याझ्वलय् थापां राष्ट्रपति रामवरण यादवयाके पद व गोपनियताया सपथ कयादीगु खः । संविधानसभा अध्यादेश २०७० या दफा ५९क या उपदफा १ बमोजिम थापां सपथ कयादीगु राष्ट्रपति ज्याकुथिं न्ह्यथंगु दु । थ्व सपथलिसें संविधानसभाया प्रक्रिया औपचारिक रुपं न्ह्याःगु दु ।
सपथ ग्रहण ज्याझ्वलय् उपराष्ट्रपति परमानन्द झा, मन्त्रिपरिषदया नायः खिलराज रेग्मी, कायममुकायम प्रधानन्यायाधीस दामोदरप्रसाद शर्मा, मन्त्रीपि, संबैधानिकनिकायया प्रमुखपिंलिसें थीथी राजनीतिक दलया नेतात दुगु खः । सपथ ग्रहण लिपा थापा संसद् सचिवालय् वनां पदभार नं ग्रहण यानादीगु खः ।
थकालीम्ह सभासद् थापां मंगलवाः न्हू बानेश्वरय् च्वंगु संविधानसभा भवनय् सुथसिया ११ ताः इलय् सकलें सभासद्पिंत पद व गोपनियताया सपथ ग्रहण याकीगु संसद् सचिवालयं धाःगु दु । थ्व सपथ धुंकाः बुधवाःनिसें संविधानसभाया नियमित मुँज्या च्वनी ।
लुमंकेबहःजू न्याकःतक प्रधानमन्त्री जुइधुंकूम्ह थापा न्हापांखुशी थकाली जूगु हुनिं सभामुख जुइगु ह्वःताः नं चूलाःगु खः ।
News Location:
