भाषा प्रशिक्षक कृष्ण प्रजापतिपाखें बृहत्त सांस्कृतिक ब्वज्या उलेज्या
श्री जागरण युवा समुहपाखें दँय् दसं थें गांया निंतिं हापं म्हुयेगु ल्याखं ग्वसाग्वःगु थीथी सांस्कृतिक ब्वज्या येँय्नं थन नेपालभाषा स्यनेत वयाच्वंम्ह भाषा प्रशिक्षक कृष्ण प्रजापतिं मैनमत च्याकाः उलेज्या यानादिल । क्याक्सी-२ स्याङ्जाया नेवाः खर्कय् जूगु उगु सांस्कृतिक ब्वज्याया मूपाहां प्रजापतिं स्थानीय मानन्धर नेवाः समुदाययात भाषा, कला व संस्कृतिइ मौलिकपन दयेमाःगु सुझाव नं बियादिल । २ वडाया पुलांम्ह वडा अध्यक्ष नेत्र नारायण मानन्धरया सभापतित्वय् जूगु उगु सांस्कृतिक ब्वज्याय् विनिता मानन्धर, शर्मिला मानन्धर, मनिषा मानन्धर, प्रकाश मानन्धर, शान्ति मानन्धरनापं आपालं मानन्धर समुदायया ल्याय्म्हपिंसं हुलाप्याखं न्ह्यब्वःगु खः ।
स्थानीय गैराखोला प्राविया ख्यलय् जूगु उगु ज्याझवलय् स्थानीय एमालेपाखें उम्मेदवारपाखें निगू लाख दां उगु विद्यालयया भौतिक निर्माणया निंतिं हापं बिउगु खः । बहनी लिबाक तक जूगु सांस्कृतिक ब्वज्याय् सगं व स्वांपाखें यानाः मुक्कं ३४ हजार तका दां मुंकूगु खः । आः गामय् खुगू लाखया कोष स्थापना यानाः थीथी विकास निर्माणय् खर्च यायेगु कथं समूहं उगु दां परिचालन यानाच्वंगु दु । थुगु ज्याझवः दँय् दसं माघीया लसताय् २०४४ सालंनिसें निरन्तर न्ह्याका वयाच्वंगु खः । ज्याझवलय् आमा समूह, स्थानीय ल्याय्म्ह व विद्यालयया शिक्षक, शिक्षिकापिं परिचालित जूगु खः ।
स्याङ्जाय् प्रशिक्षक कृष्ण प्रजापतिया सम्मान
येँय्नं भाषा प्रशिक्षणया लागिं स्याङ्जाया अति दुर्गम लागा क्याक्मी गाविसय् तकं थ्यंका भाषा प्रशिक्षण यानाः च्वनादीम्ह नेपालभाषा प्रशिक्षक कृष्ण प्रजापतियात स्थानीय जनतां सार्वजनिक अभिनन्दन याःगु दु । छगू गुंभ्वय्या दथुइ जूगु विशेष ज्याझ्वलय् येँय्नं वःम्ह भाजु प्रजापतियात स्थानीय जागरण महिला समूह, दीपज्योति आमा समूह व मगर समुदायपाखें स्वांमाः क्वखायेकाः अभिनन्दन याःगु खः ।
वरिष्ठ उद्योगपति खोमाप्रसाद अर्यालया मूपाहांसुइ जूगु गुंभ्वय् ज्याझ्वलय् दीपज्योति आमा पुचःपाखें थीथी सांस्कृतिक ब्वज्या नं न्ह्यब्वःगु खः । क्याक्मी गाविसया दग्दीइ न्ह्यानाच्वंगु बासुरी व धिमे प्रशिक्षार्थीपिंपाखें धिमे व बासुरीया धुंनं नं लसकुस याःगु उगु ज्याझ्वलय् नेपाली कांग्रेस २ नं. क्षेत्रया सभापति केदार काफ्ले, पलांम्ह गाविस अध्यक्ष देवकमार मानन्धर, अन्तर पार्टीहिला सञ्जालया अध्यक्ष मुरली लम्साल, नेपाल विद्यार्थी संघया क्षेत्रीय सभापति विश्वा लम्सालपिंसं न्ववानादीगु खः ।
