नेपालभाषा सफू बहुउद्देश्यीय सहकारी संस्थाया उलेज्या
मुक्कं नेपालभाषाया सफू पिथनेगु व पिदंगु सफू ब्वँमिपिंथाय् तक थ्यंकेगु तातुनां “च्वमि व ब्वँमि जायेनु, झीगु भाषा च्वः जायेकेनु” धइगु नारा छुनां “नेपालभाषा सफू बहूउद्देश्यीय सहकारी संस्था लिमिटेड” नांया छगू संस्था थौं विधिवत् रुपं उलेज्या जूगु दु । येँय् वडा नं. २३ य् च्वंगु ओलम्पस क्लबया भवनय् मू–पाहाँ प्रो. माणिकलाल श्रेष्ठं सुकुन्दा च्याकाः उगु संस्थाया उलेज्या यानादीगु खः ।
२८ म्ह संस्थापक दुजः दुगु थुगु बिस्कंगु 'नेपालभाषा सफू बहूउद्देश्यीय सहकारी संस्था लिमिटेड'य् गणेशराम लाछिया नायःसुइ झिंस्वम्हेसिया कार्यकारिणी समिति दयेकूगु दु । गुकी न्वकू शौरभ शाक्य, छ्याञ्जे हरिप्रसाद श्रेष्ठ, ल्यू छ्याञ्जे बसन्त महर्जन, दांभरि नृपेन्द्रलाल माय्केँ, ल्यू दांभरि रेवन्तलाल श्रेष्ठ अले दुजःपिं कृष्णभक्त बोडे, विमल ताम्रकार, राम मानन्धर, केशवराज श्रेष्ठ, अष्टनारायण महर्जन, नःलि बज्राचार्य व गोपाल महर्जनपिं च्वनादीगु खः ।
सहकारी संस्थाया मू उद्देश्य धइगु शेयर लगानी याना दां हे लाभांस कायेगु खः । तर थ्व सफू बहुउद्देश्यीय सहकारी संस्था लिमिटेडं दांया पलेसा लाभांस कथं सफू बीगु संस्थाया नायः गणेशराम लाछिं उलेज्याझ्वलय् ध्वाथुइका दिल । थुगु संस्थाय् दुजः जुइत झिद्वः तका दां दुतिनेमाःगु व निश्चित अबधि तक दां लितकाये मदइगु उकिया वापत दँय् छकः बैंकं बीगु ब्याज स्वयां अप्वयेक मू बराबरया सफू बीगु जानकारी ब्यूगु दु । निश्चित अवधि धुंकाः यदि मंमदुसा झिद्वः दां लितंतु बीगु नं जानकारी वय्कलं बियादिल । लिसें थ्व सहकारींयानां च्वमिपिनिगु मू समस्या जुयाच्वंगु पिकाकः लुइके मफइगुयात ज्यंकेगु लिसें अःपुक हे पिदंगु सफूत ब्वँमिपिंथाय् तक थ्यंके फइगु व्यवस्था जुइगु धयादिल । न्हापां न्यासःम्ह दुजः दयेकेगु ताःतयागु ग्वसाखलकं जानकारी ब्यूगु दु ।
गणेशराम लाछिया सभापतित्वय् न्ह्याःगु थुगु ज्याझ्वलय् न्वकू शौरभ शाक्यं लसकुस यानादीगु खःसा संस्थाया बारे ल्यू छ्याञ्जे बसन्त महर्जनं ध्वाथुइकादिल । लोकंह्वाःपिं च्वमिपिं मथुरा सायमि, योगेन्द्र प्रधान, नविन चित्रकर लिसें रत्नकाजी महर्जनपिसं भिंतुना न्वचु बियादीगु खः ।
दुजः कृष्णभक्त बोडें सुभाय् बियादीगु ज्याझ्वः संस्थाया छ्याञ्जे हरिप्रसाद श्रेष्ठं न्ह्याकादीगु खः ।
लुमंकेबह जू, नेपालभाषाया सफू, सिडि लिसें थीथी दोहलपा देछायेत देस व विदेशं समेत अःपुक न्यायेत आधुनिक युगलिसें पाचिनां सेवा बियाच्वंगु छगूजक अनलाइन सर्भिस कार्टमण्डप डटकम न्ह्यानाच्वंगु दुसा मेगु छुं न्हि न्ह्यःहे जक चाःगु 'मंकाः पसलं' नं नेपालभाषाया सफू व सिडि मीगु ज्या यानाच्वंगु दु ।
News Location:
