अस्पताल बन्द यानाः डाक्टरपिं आन्दोलनय्
नेपाल चिकित्सक संघं आमरण अनसनय् च्वनाच्वंम्ह डा. गोबिन्द केसीया माग सम्बोधन यायेत सरकारयात नीप्यघौया अल्टिमेटम ब्यूगु दु ।
थःपिनिगु माग पूमवंसा कन्हय्निसें देय्न्यंकया अस्पतालत ठप्प यानाः डाक्टरतय्त स्वनिगलय् क्वकायेगु संघं ख्याच्वः नापं ब्यूगु दु । थःगु हे ज्याकुथिइ थौं पत्रकार सम्मेलनया ग्वसाः ग्वयाः उगु ख्याच्वः ब्यूगु खः ।
संघं संस्थानया डीनय् डा. शशि शर्मा नियुक्तिया विरोधय् अनसनय् च्वनाच्वंम्ह प्रा.डा. केसीया न्हय्गू बुँदे व संघया न्यागू बुँदे माग नीप्यघौदुने पूवंकेत अल्टिमेटम ब्यूगु खः ।
पत्रकार सम्मेलनय् न्ववानादिसें नायः अञ्जनीकुमार झां माग पूमवंसा आइतबाःनिसें देय्न्यंकया फुक्क अस्पताल ठप्प यायेगु घोÈणा यानादीगु खः । डा. केसीया मागप्रति बेवास्ता याःगु न्ह्यःथना संघं शिक्षामन्त्री माधव पौडेलया राजीनामाया नापं माग याःगु दु ।
झां डीन नियुक्तिइ मन्त्रिपरिषदया नायः खिलराज रेग्मीया नं परोक्षरुपं ल्हाः दुगु द्वपं ब्यूगु दु । झां ल्वगिपिंत नीप्यघौ न्ह्यः हे थःगु उसाँय् जा“च यायेत व डाक्टरतय्त उपचार सेवा बीत इनाप नापं यानादीगु दु ।
थ्वहे दथुइ, शिक्षण अस्पतालया चिकित्सकतय्गु हड्ताल अत्यावश्यकीय सेवा ऐन अःखः जूगु न्ह्यःथना सर्वोच्च अदालतय् रिट दायर जूगु दु ।
अधिवक्ता सुनिल रञ्जन सिंह व उपभोक्ता हित संरक्षण मञ्चं अत्यावश्यकीय सेवा ऐन २०१४ या दफा ३ अःखः अस्पतालय् हड्ताल जूगु न्ह्यःथना रिट दायर याःगु खः । रिटय् हड्ताल चायेकेत अन्तरिम आदेशया माग यायेगुया नापनापं अत्यावश्यकीय सेवा ऐन कडा रुपं लागू यायेत माग याःगु दु ।
त्रिभुवन विश्वविद्यालय चिकित्साशास्त्र अध्ययन संस्थानया डीनय् डा. शशि शर्मायात नियुक्त याःगु विरोधय् प्रा.डा. गोविन्द केसीं न्ह्याकुगु आमरण अनसनप्रति ऐक्यबद्धता क्यना शिक्षण अपस्तालया डाक्टरतय्सं थौंनिसें आकस्मिक लिसेया सेवा ठप्प याःगु दु ।
थ्वहे दथुइ, शिक्षण अस्पतालया चिकित्सकतय्सं त्रिवि उपकुलपतिया ज्याकू घेरय् याःगु दु । थ्यंमथ्यं निसःया ल्याखय् शिक्षण अस्पतालया आवासीय डाक्टरपिनिगु नेतृत्वय् थ्यंगु पुचलं नाराबाजी यानाः ज्याकू घेरय् याःगु खः ।
शिक्षण अस्पताल महाराजगञ्जय् थीथी माग तयाः अनसनय् च्वनादीम्ह डा. गोविन्द केसीप्रति ऐक्यबद्धता क्यनाः उमिसं उपकुलपतिया ज्याकू घेरय् याःगु खः । उपकुलपतिया ज्याकुथिइ धाःसा नेपाल प्रहरी व सशस्त्र प्रहरीयात छ्यःगु खः ।
