१६ क्वःगु राष्ट्रिय भ्वखाय् सुरक्षा दिवस
“मन्यँसे, महासे वइ भुकम्पीय विपद्, दने, न्ह्यःज्याये ल्यंकेत सृष्टिया सम्पदा” धइगु मू नारालिसे थौं झिंखुक्वःगु राष्ट्रिय भ्वखाय् सुरक्षा दिवस देय्न्यंक थीथी ज्याझ्वःया ग्वसाः ग्वयाः हनेगु ज्या जुयाच्वंगु दु ।
भुकम्प प्रविधि राष्ट्रिय समाज नेपाल एनसेट संस्थाया सक्रियताय् सरकारं थुगुसी नं देय्न्यंक भुकम्प दिवस हनेगु तयारी याःगु खः । वि.सं. १८९० सालय् नेपालय् ७ दशमलव ८ रेक्टर स्केल व वि.सं. १९९० सालय् ८ दशमलव ४ रेक्टर स्केलया तच्वःगु भ्वखाय् वयाः तःधंगु ल्याखय् धनजनया क्षति जूगु खः ।
वि.सं. १९९० सालया तच्वःगु भ्वखाय्सं नेपालय् ४ हजार ६६९ मिसा व ३ हजार ८ सय ५० मिजं यानाः ८ हजार ५ सय १९ म्ह मनूत सीगु खः । स्वनिगलय् जक ४ हजार २ सय ९६ म्ह मनूत सीगु खः । उगु तच्वःगु भ्वखाय्सं २ लख ७ हजार ७४० छेँय्त दुनाः ध्वस्त जूगु खः ।
भुकम्पीय जोखिमया दृष्टिकोणं स्वनिगः विश्वया हे जोखिम शहर मध्ये उच्च जोखिमय् दुगु शहर कथं कायेगु याः । नेपाःया ५४ लख छेँय् मध्ये १० प्रतिशत छेँय् जक भ्वखाय्पाखें प्रतिरोधात्मक क्षमताया दु ।
दकलय् अप्वः स्वास्थ्य क्षेत्रया अस्पताल, मेडिकल कलेज, खुसिलिक्कया हाउजिङ्ग, विद्यालय व पुलांगु डिजाईनया छेँय्त दु । येँया असं लागा दकलय् अप्वः जोखिमपूर्ण थाय् कथं नं कायेगु याः ।
