भाषा प्रशिक्षक कृष्ण प्रजापतिपाखें गाः परिषद् उलेज्या
स्याङ्जाय् वानाः भाषा नेपालभाषाया प्रशिक्षण यानाच्वनादीम्ह भाषा प्रशिक्षक कृष्ण प्रजापतिं क्याक्मी गाविसया २२ क्वःगु गाः परिषद मैन मत च्याकाः ब्यानर ब्यना उलज्या यानादिल । मूपाहाँया थासं न्ववानादिसें वय्कलं राज्यपाखें जाति जनजातिया निंतिं फ्यानातःगु दांपाखें उचित ज्यात न्ह्यानाः राष्ट्रिय गौरव जुयाच्वंगु थीथी भाषा व संस्कृतिया रक्षा यानाः पहिचानयात ध्वाथुइके स्वयेमाःगु खँ कनादिल ।
क्याक्मी गाविसया पुलांम्ह गाविस अध्यक्ष व नेपाली कांग्रेस स्याङ्जा जिल्ला दुजः देवकुमार मानन्धरं गांया ज्याय् राजनीतिक विवाद यानाच्वनेगु बेकार खः धयादिल । नेकपा एमालेया बैकल्पिक जिल्ला दुजः विष्णुबहादुर चन्दं गामय् बिजुली मतः च्याकेगु ख“ प्राथमिकताय् तयेमाः धयादिल । एकीकृत नेकपा माओवादीया प्रतिनिधि प्रेम हमालं स्थानीय मगरतय्गु उत्थान व विकासया लागिं गाविसं विशेष ज्याझवः हयेमाःगु माग यानादिल । नेकपा-माओवादी राज्यपरिषद दुजः यामबहादुर विकं लक्षित वर्गयात अलग्ग यानातःगु बजेट सुदपयोग जुइमाः धयादिल ।
क्याक्मी गाविसया सचिव व कार्यवाहक गाविस अध्यक्ष दुर्गाप्रसाद पौडेलं सभापतिया थासं वार्षिक प्रतिवेदन व बजेट न्ह्यब्वयादीग ज्याझ्वलय् एमाले नेता कृष्णप्रसाद सुवेदी, माओवादी नेता इन्द्रकुमार थापा, उपस्वास्थ्य चौकी इन्चार्ज मैना अर्याल नापं चोलिमैया थापापिंसं नं न्ववानादीगु खः । ज्याझ्वलय् छवाः न्ह्यःनिसें तिनि न्ह्याःगु जूगु धिमे व बासुरीया प्रशिक्षार्थीपिंपाखें नं द्यः ल्हायेगु ज्या जूगु खः ।
