नेवाः राज्यया निंतिं न्हूगु चरणया आन्दोलनया सुरुवातया उद्घोष

नेवाःतय् अस्थित्व ल्यंकात्येत नेवाः राज्य : संस्कृतिविद् जोशी

नेवाः स्वायत्त राज्य पलिस्था यायेत जुयाच्वंगु आन्दोलनया न्हूगु चरणया सुरुवात जूगु उद्घोष यासें नेवाःतय्सं बिहीवाः प्यक्वःगु नेवाः एकता दिवस हंगु । नेवाःतय्सं थुगु दिंयात लसताया न्हि कथं जक मखसें अधिकार प्राप्तिया निंतिं न्हूगु चरणया सुरुवात कथं हंगु दु ।

एकता दिवसया लसताय् नेवाः स्वायत्त राज्य मंकाः संघर्ष समितिया ग्वसालय् येँया बसन्तपुली जूगु तःजिगु ज्याझ्वलय् न्ववापिं वक्तातय्सं आःया आन्दोलन नेवाः एकता नापं अधिकार प्राप्तिया आन्दोलनय् लगे जुयाच्वंपिं फुक्क पक्षत दथुइ एकता यानाः वनेमाःगु बिचाः प्वंकूगु दु ।

संस्कृतिविद् डा. सत्यमोहन जोशीं नेवाःतय् अस्तित्व हे तनावनेत्यंगुलिं थःगु अस्तित्व ल्यंकात्येत स्वशासन सहितया नेवाः राज्य आवश्यक जूगु खँ धयादीगु दु । वय्कलं आः हे सच्छिम्ह नेवाःत मध्ये स्वीखुम्हेसित जक नेवाः भाय् वःगु धयादिसें थज्याःगु हे अवस्था जूसाः मेगू नीन्यादँया दुने हे नेवाः अस्तित्व मालेत थाकुइगु धयादिल । वय्कलं झी अस्तित्व ल्यंकेत स्वशासन सहितया नेवाः राज्य आवश्यक जूगु धयादिल ।

संघर्ष समितिया नायः मनोज नेवाःया सभापितत्वय् न्ह्याःगु ज्याझ्वलय् नेवाः न्ह्यलुवाः पद्मरत्न तुलाधारं नेवाःत दथुइ राजनैतिक चेतनाया अभावं झीगु अधिकार प्राप्ति अझ नं तापानाच्वंगु धयादिल । वय्कलं नेवाःत दथुइ भ्वय् न्ययेगु, बाजं थाय्गु व जात्रा यायेगुलि एकता दुथें आः बिचाः, अवधारणा व राजनीतिकया निंतिं एकता क्यनेमाःगु खँय् बः बियादिल । थःगु अधिकार प्राप्त यायेगु निंतिं अझ नं क्रान्ति आवश्यक जूगु धयादिसें वय्कलं दक्वं जातिया अधिकार सुनिश्चित जूगु लोकतन्त्रया पक्ष नेवाःत दुगु धयादिल ।

अथेहे नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं संघर्ष समितिया अवधारणा न्ह्यब्वयेगु झ्वलय् पहिचान सहितया संघीयताया मुद्दा राष्ट्रिय मुद्दा जुइधुंकूगुलिं थ्व मुद्दा बुत धइगु न्ह्यसः हे मवइगु धयादिल । वय्कलं नेवाः पहिचान सहितया संघीयता मवसाः अज्याःगु संविधानयात नेवाःतय्सं अस्वीकार याइगु धयादिल ।

ज्याझ्वलय् नेपाल आदिवासी महासंघया नायः नागेन्द्र कुमाल व मधेशी बुद्धिजीवी विजककान्त लाल कर्णं गोरखा राज्य विस्तार नापं सुरु जूगु छगू जातिया हालिमुहालीयात त्वाःथला सकल नेपाःमितय् मंकाः देय् दयेकेत हे पहिचान सहितया संघीयता माःगु खँय् बः बिउगु खः ।

ज्याझ्वः लिपा न्ह्याःगु जुलुस येँया थःने लागाः चाहिला शान्तिबाटिकाय् क्वचाःगु खः । नेपाल संवत् ११२९ पोहेलाथ्व नवमि कुन्हु जनस्तरं नेवाः स्वायत्त राज्य घोषणा याःगु न्हियात कयाः नेवाःतय्सं दँय्दसं नेवाः एकता दिवस कथं हनावयाच्वंगु दु ।