न्हूदँया लसताय् जागरण मञ्चया संगीत नाइट
नेवाः जागरण मञ्चया कवः नेवाः जागरण संकिपा समितिं थ्वहे वइगु पुस ३० गते थनया क्षेत्रपाटी पार्टी प्यालेसय् न्हूदँ ११३४ या लसताय् तःजिक नेवाः संगीत नाइट व नेवाः फूड फेस्टिबल याइगु जूगु दु ।
संकिपा समितिया प्रमुख विजयरत्न असंबरेया नायःसुइ च्वंगु मुँज्यां संगीत नाइटया संयोजनया भाला नेपालभाषां ग्यानापु स्टाइल हालाः चर्चाय् वःम्ह कलाकार सुरजवीर बज्राचार्ययात ब्यूगु दु । उगु संगीत नाइट ज्याझ्वलय् कलाकारपिं भीम तुलाधर, सानुबाबु महर्जन, सुमन कपाली, सरस्वती मानन्धर, किशोर शाही, रत्नशोभा महर्जन, सतीश महर्जन, निशा देसार, दीपा महर्जन, रीता महर्जन, सुरजवीर बज्राचार्य, भुपेन्द्र बज्राचार्य, माणिक शाही, सुलिन्द्र शाक्य, प्रवेश मान शाक्य व गोविन्द ह्यूमतपिसं थःथःगु लोकंह्वाःगु म्येत न्ह्यब्वयादीगु जूगु दु ।
ज्याझ्वलय् पाहाँकथं नांजाःपिं कलाकारपिन्त ब्वनातःगु दुसा अथेहे नेवाः कला क्षेत्रय् निरन्तर ज्या यानाच्वंपिं कलाकारपिन्त सम्मान नं याइगु जूगु दु ।
संगीत नाइट ज्याझ्वःया लिसेलिसें नेवाः फूड फेस्टिबलकथं नेवाः नसात्वँसाया व्यवस्था नं उगु ज्याझ्वलय् याइगु खँ ग्वसाः खलकं धाःगु दु ।
नेवाः जागरण संकिपा समितिं वंगु प्यदँ न्ह्यःनिसें थुकथं नेवाः ख्यलय् न्हूगु ज्याझ्वःकथं नेवाः संगीत नाइट यानावयाच्वंगु दु ।
