नेवा: प्रदेश हयेत नेवा: एकता दिवस

पोहेलाथ्व ९ धइगु नेवा:तसें न्ह्याकावयाच्वंगु थौंतकया आन्दोलनय् छगू उत्कर्षया न्हि ख: । उखुन्हु दशरथ रंगशालाय् सकलें नेवा:त मुना: सकल नेवा:तय्गु मंका: आकांक्षाया विषय जूगु नेवा: स्वायत्त राज्यया उद्घोष जूगु न्हि ख: । नेवा:त दुने दयाच्वंगु थीथी जात जातिया विभेद, थाय् व लागाया विभेद अले राजनीतिक दलगत विभेदयात चीका: छगूहे मञ्चया क्वय् मुंवल । नेवा: दुनेया ३२ गु जातिं छथाय् तुं हे च्वना: सकल नेवा:तय्गु मंका: आकांक्षा जूगु नेवा: स्वायत्त राज्यया उद्घोष जुल ।
थ्वहे खँयात लुमंका: दँय्दसं थुगु न्हियात नेवा: एकता दिवसया रुपय् हनेगु परम्परा सुरु जूगु ख: । नेवा:तय् दथुइ थीथी कथंया विभाजन दुगु हुनिंहे नेवा:तसें शासन प्रशासनय् थ:गु उपस्थिति क्यनेगुली ल्यूने मखु, पहँुचय् नं तसकं ल्यूने लानाच्वंगु दु । थ्वहे अवस्थायात बिचा: यासें न्हापा नं भाषा आन्दोलनय् सनाच्वंपिसं नेवा:त छवा: जुइमा:गु नारा बिया वयाच्वंगु हे ख: । नेवा:तय् दथुइ एकता मदुगु सवाल ला आपा: नेवा:तसें थवंथवय् खँ ल्हायेबलय् नं धयाहे वयाच्वंगु खँ ख: । थुगु अवस्थाय् नेवा: एकता दिवसया महत्व ला अतिकं जा:गु हे जुल ।
नेपालय् आ:तक संवत आन्दोलनया झ्वलय् न्हूदँया सांस्कृतिक जुलुस हे नेवा: एकता प्रदर्शन थें जुयाच्वंगु दु । तर न्हूदँ खुन्हु छन्हु जक मुनीपिं नेवा:त थ:थ:गु लजगा:, थ:थ:गु छेँज:, थ:थ:गु पार्टी, थ:थ:गु थाय् बाय् धइगु कथंहे लगे जुयाच्वंगु दु । नेवा:तसें धात्थें हे नेवा: भावनाय् रंजित जुइगु अर्थात नुगलय् दुने नेवा:या रंग छीगु ज्याय् धा:सा उलि अभ्यास हे मदुगु खनेदुगु दु । थुकथंया अभ्यासया निंतिं थीथी ज्याझ्व: व उकी थ:गु सहभागिता व योगदान दयेमा: वास्तवय् मनूतय्गु स्वभावकथं हे थ:पिं सहभागी जूगुली, थ:पिसं योगदान ब्यूगुलीहे मनूतय् नुग: नं क्वसाया वनीगु ख: । अथेजूगुलिं नं नेवा:या नामं मुँज्या व ज्याझ्व:त नं यक्य यक्व जुयावनेमा:गु खनेदु । नेवा: एकता दिवश थ्वहे झवलय्या छगू ज्याझव: नं ख:, अले थ्व थुलिचां तुं जुया: सिधयेमज्यू, थुकिं छगू नेवा: ख्य: न्ह्या: वनेगु नितिं छगू प्रेरणा छगू ‘इम्पोस’ या ज्या नं यायेमा: । धात्थेंला झी सकलें नेवा:त नेवा: स्वायत्त राज्ययात आ: वइगु संविधानय् सुनिश्चित याकेत न्ह्या: वनेमा:गु दु । नेवा: स्वायत्त राज्य मंका: संघर्ष समितिं थुकिया निंतिं छगू मंका: दबूया रुपय् स्थापित जुया: नेतृत्व न्ह्याकावयाच्वंगु दु । थ्वहे नेवा: स्वायत्त राज्य मंका: संघर्ष समितिया नेतृत्वय् हे थुकथं झीसं नेवा: एकता दिवश हने त्यनागु ख: ।
नेवा: स्वायत्त राज्य मंका: संघर्ष समितिया नेतृत्वय् नेवा: पहिचान सहितया आन्दोलनय् झीपिं सरिक जुुयाच्वनागु स्थितिइ नेवा: एकता दिवश हनेगु ज्यां नेवा:तय्गु नेवा: प्रदेश प्रतिया प्रतिबद्धतायात हानं छक्व: उजागर याना: क्यनीगु स्पष्ट जू । चुनाव जुया: न्हूगु संविधानसभा गठन जूगु थुगु स्थितिई नेवा:तसें हानं छक्व: थ:गु आकांक्षा व प्रतिबद्वतायात उजागर याना क्यने नं मा:गु दु । वंगु चुनावय् पहिचानया मुद्दा बुत धका: धा:पिन्त झीसं झ्यातुगु लिस: नं बीमा:गु दु ।
वास्तवय् थौकन्हय् संघीयता विरोधीत थीथीकथं लय्तायाच्वंगु दु । ज्यूसा नेपालय् संघीयताया मुद्दा हे अलप यायेगु दाउ नं जुयाच्वंगु दु । थुज्व:गु अवस्थाय् झीपिं सुम्क च्वनेगु धइगु झीगु त:धंगु व भावी पुस्तां नं झीत सरा: बीगु भूल जुइफु । अथे जूगुलिं नेवा: स्वायत्त राज्य प्राप्तिया निंतिं युद्ध यायेमा:सां न्ह्यचिलेमा:गु इलं फ्वनाच्वंगु माग ख: । तर युद्ध हे यायेफुगु अवस्था मदुसां संघर्षया शंखघोष ला यायेमा:गु दु । थ्व थुगु नेवा: एकता दिवसया झ्वलय् हे जुइमा: ।
नेवा: एकता दिवश हनेगुया थुपिं हे उद्देश्य ख: । मूल उद्देश्य धइगु झीगु थ:गुहे अग्राधिकार सहितया स्वायत्त राज्य प्राप्ति हे ख: । गुलिगुलिसिनं थुज्व:गु पहलं नेवा: राज्य गुकथं वइ धका: धयाच्वंगु दु । तर म्हिग: थें नेवा: राज्य हे छु यायेत माल धइगु स: ला आ: नेवा:तसें धायेगु मयायेधुंकल थ्व नं छगू कथं प्रगतिय खँ ख: ।
नेवा:तय्त थ:गु हे जातिय पहिचानया राज्य मा: धइगु सवाल व आन्दोलनया विकास लिपा हे वया तिनि जूगु ख: । संघीय नेपा: राष्ट्र दुने नेवा: राज्य नं धस्वायेमा: धइगु झीगु माग: ख: । अथेला आ: थुकी अपालं आपा: पंग:त न्ह्य:ने खनेदया च्वंगु दु । तर नेवा:त धात्थेंहे एकताबद्ध जुइफत धा:सा नेवा: स्वायत्त राज्य वा नेवा: प्रदेश सुनिश्चित ख: ।

More Stories Like this