सरकारी अस्पतालय् न्हापांगु खुसीइ टेस्टट्युब बेबी
नेपाःया सरकारी अस्पतालय् न्हापांगु खुसीइ टेस्टट्युब प्रविधिपाखें मचा बुइकूगु दु । निजी अस्पतालय् जक थज्याःगु प्रविधिपाखें मचा बुइकेगु ज्या जुयावःगु खःसा मंगलवाः न्हापांगु खुसीइ सरकारी अस्पतालय् सफलतापूर्वक थुज्याःगु ज्या जूगु खः । येँया थापाथलीइ च्वंगु प्रसूति गृहय् टेस्टट्युब प्रविधिपाखें स्वम्ह मिसां मचा बुइकेगुलि सफलता प्राप्त जूगु खः ।
थज्याःगु प्रविधिपाखें किपूया मय्जु राज्यलक्ष्मी महर्जन, जनकपुरया मय्जु रानी मल्लिक व जोरपाटीया मय्जु चन्द्र लक्ष्मी श्रेष्ठं टेस्टट्युुब बेबी बुइकूगु खः । स्वम्ह मध्ये किपूया महर्जनं साढे दुइ किलोदुपिं निम्ह काय् बुइकूगु खः । अथेहे जनकपुरया मल्लिकं २ दशमलव ४ किलो दुम्ह काय् व जोरपाटीया श्रेष्ठं २ दशमलव ३ किलो दुम्ह म्ह्याय् बुइकूगु खः । न्याम्ह मिसातय्सं टेस्टट्युब बेबीया निंतिं कुतः याःगु खःसां मंगलवाः स्वम्हेसियापाखें जक शल्यक्रिया यानाः सन्तान बुइकूगु खः ।
प्रसूति गृहया डा. उषा श्रेष्ठ व डा. भाबा मल्ल श्रेष्ठ व सिस्टरपिं गायत्री सुबेदी, राधा शाक्य, जमुना पोखरेल व रोशनी शिलाकारया पुचःया ग्वहालिं न्हापांगु खुसीइ सरकारी अस्पतालय् थज्याःगु प्रविधियात सम्भव याकूगु खः ।
निजी अस्पतालय् न्यागू लख तका तुइगु थुगु प्रविधिया निंतिं प्रसूति गृहपाखें धाःसा छगू लख खुइद्वः तकाया खर्चया दुने थुगु सेवा प्रदान याःगु खः ।
