संकिपा नखःया ग्वाहालिमिपिंत सुभाय् देछात
विजयरत्न असंबरे
निक्वःगु नेवाः संकिपा नखः ११३३य् ब्वति काःगु संकिपा व नखः ताःलाकेत ग्वाहालि याःपिंत सुभाय् देछायेगु तातुना येँया दक्षिण भेगय् लाःगु छैमले गाविसय् च्वंगु छैमले रिसोर्टय् छगू तःजिगु ज्याझ्वः जुल ।
मछिन्द्र क्लबया ग्वसालय् थगुने निसें जुयावयाच्वंगु संकिपा नखःया निक्वःगू संस्करण वंगु ञलाथ्व १२ (भदौ ३१) निसें ञलागा चौथि (असोज ७) तक च्यान्हूयंकः थन येँया जनबाहा पिने सम्पन्न जूगु खःसा उके फिचर फिल्म च्यागु व शर्ट फिल्म प्यंगू क्यने ज्याः जूगु खः ।
तःजिक क्वचाःगु निक्वःगु नेवाः संकिपा नखः ११३३ तालाकेत ग्वाहालियाःपिं संकिपामि, संघसंस्था व सञ्चार माध्यमयात सुभाय् पौ लःल्हाःगु उगु ज्याझ्वलय् सन्ध्या टाईम्स, झीगु स्वनिगः, पेजथ्री लगायत थीथी मिडियायात सुभाय् पौ लल्हाःगु खः ।
मछिन्द्र क्लबया नायः जीवेन्द्रलाल कर्माचार्यया सभानायसुई जूगु उगू ज्याझ्वलय् नांजाम्ह म्येहालामि भृगुराम श्रेष्ठ, कलाकार एवं पुलांम्ह फुटबल कासामि नीलकाजी शाक्य, छैमले रिसोर्टया कजि नीलकण्ठ श्रेष्ठ, सिने पत्रकार विजयरत्न असंबरेपिंसं सुभाय् पौ लःल्हानादीगु खः । ज्याझ्वलय् क्लबया छ्याञ्जे श्यामसुन्दर श्रेष्ठं लसकुस न्वचु बियादीगु खः ।
उगुहे ज्याझ्वलय् नेपाःया नांजाम्ह ध्वनि प्राविधिक दीपकमान श्रेष्ठलिसे “संकिपाय् सःया मू” यात कया सहलह नं जूगु खःसां ज्याझ्वलय् सिने पत्रकार व निर्देशक विजयरत्न असंबरेभाजुं नेवाः संकिपाख्यःया थौंया स्थीतिबारे जानकारी बियादीगु खः ।
