'आक्रोसया मतयात जनमत धायेगु पाय्छि जुइमखु'
नेवाः स्वायत्त राज्य मंकाः संघर्ष समितिया सचिवालय् कजि मल्ल के. सुन्दरं निक्वःगु संविधानसभाया लिच्वः आक्रोसया मत जक जूगुलिं उकीयात जनमत धायेगु पाय्छि मजुइगु धयादिल ।
नेवाः पत्रकार दबू व नेवाः मंका संघर्ष समितिया मंका ग्वसालय् जुगू अन्तरक्रिया ज्याझ्वलय् वय्कलं संविधानसभाया लिच्वःयात कयाः विश्लेषण यायेगु झ्वलय् धयादिल, 'आक्रोसया मतयात जनमत धायेगु पाय्छि जुइमखु' ।
नेवाः एकता दिवसयात नेवाः आन्दोलन कथं न्ह्याकेत जुगू उगु ज्याझ्वलय् मल्लं पहिचानया मुद्दा धाइगु राष्ट्रिय मुद्दा जुगूलिं छु नं कथं कमजोर जुइमफइगु धयादिसें राष्ट्रिय मुद्दायात सम्बोधन मयायेकं सामाजिक, राजनीतिक, क्षेत्रीय, भाषिक, लैंगिक, विभेद अन्त्य जुइमफइगु व स्थायी शान्ति नं वये मफइगु खँ कनादिल ।
अथेहे पहिचानया सन्दर्भय् मल्लं धयादिल, 'मू पहिचान त्वःता कचाः पहिचान अस्तित्वय् मवइगुलिं एकल पहिचानया आधारय् राज्य पुनःसंरचना जुइमाः' । नापं वय्कलं न्ह्यने वयाच्वंगु नेवाः एकता दिवसयात पहिचान पक्षधरया एकता कथं नेवाःत दुने जन समिति यानाः मतेगु खँ कनादिल ।
ज्याझ्वलय् नेवाः पत्रकार राष्ट्रिय दबूया नायः भाजु श्रीकृष्ण महर्जनं मंका संघर्ष समितिलय् नेवाः पत्रकार दबूयात नं पदेन दुजः कथं दुथ्याकेत माग यानाः दिल ।
ज्याझ्वः नेवाः मंका संघर्ष समितिया नायः भाजु गजेन्द्रमान मानन्धरया नायसुइ न्ह्यागु उगु ज्याझ्वलय् नेवाः पत्रकार दबूया पदाधिकारीपिं व नेवाः मंका सघर्ष समितिया पदाधिकारीपिंनिगु ब्वति दुगू खः ।
