यःमरि व उधौली नखः झः झः धायेक हन
मार्ग शुक्ल पुन्हिया लसताय् थौं धान्यपुन्हि हनेगु ज्या जूगु दु । दच्छिया वा दुकायेधुंकाः धान्यपर्वत दयेकाः धनेश्वरया पुजा अर्चना व अन्नदान यानाः धान्यपूर्णिमा हनेगु याइगु खः ।
धान्यपूर्णिमाया लसताय् नेवाः समुदायं थौं यःमरि पुन्हि नखः हनेगु ज्या जूगु दु । थौंया दिं न्हूगु वाया छुचुंपाखें लक्ष्मी, कुमार व गणेद्यःया स्वरुपय् मरि दयेकेगुया नापनापं हाम्वः व चाकु तयाः यःमरि दयेका पुजा यायेगु चलन दुगु खः ।
जाकिया छुचुंपाखे दयेकातःगु यःमरि क्वाःलःया बाफं जक दयेकीगु थुगु यःमरि तसकं साइगु व उसाँय्या हिसाबं व वातावरण अनूकुल उपयुक्त कथं कायेगु याइ । नेवाः समुदायदुनेया ज्यापु समुदायं थौं तःजिक बसन्तपुरसं छगू विशेष ज्याझ्वःया ग्वसाः ग्वयाः झिक्वःगु राष्ट्रिय ज्यापु दिवस झः झः धायेक हनेगु ज्या जूगु खः । उगु हे ज्याझ्वलय् थीथी खलः व व्यक्तिपिंत नं हनेगु ज्या जूगु खः ।
अथेहे किराँत समुदायपिंसं थौं थःपिनिगु तःजिगु नखः उधौली पर्व हनेगु ज्या नं जूगु दु । हरेक दँ मंसिर पूर्णिमा अर्थात धान्य पूर्णिमाया दिं खुन्हु हनीगु थुगु उधौली पर्वया लसताय् किराँत समुदाय छगू हे थासय् मुनाः साकेला सिली प्याखँ हुला भिंतुना कालबिल यायेगु चलन दु ।
अन्नबाली दुकायेगु इलय् भूमि व पूर्खातय्गु सम्मानकथं मंसिर पुन्हिया दिं पुजालिसे साकेला प्याखँ हुलेगु याइ । किराँत समुदायसं वा पीगु इलय् बैशाख पुन्हियात उभौली व वा दुकायेगु इलय् मंसिर पुन्हियात उधौली पर्वया रुपय् हनेगु चलन दु ।
उधौलीया लसताय् सरकारं थौं सार्वजनिक बिदा नापं ब्यूगु दु । २०६५ सालंनिसें उधौली नखःया लसताय् सरकारं राष्ट्रिय बिदा बियाः वयाच्वंगु खः ।
थ्वहे दथुइ किराँतपिनिगु तःजिगु नखः उधौलीया लसताय् राष्ट्रपति डा. रामवरण यादवं नेपाः देय् व नेपाः देशं पिने दुपिं सकल किराँत समुदायपिंत भिंतुना देछायादीगु दु । वय्कलं थ्व नखः सकल नेपाःमिपिनिगु सामाजिक सामञ्ज्यस्ता कायम याइगु प्रतीककथं च्वनेफयेमा धकाः भिंतुना देछायादीगु खः ।
थुकथं हे उपराष्ट्रपति परमानन्द झा, मन्त्रीपरिषद्या नायः खिलराज रेग्मीपाखें नं उधौलीया लसताय् भिंतुना देछायादीगु दु । उधौलीया लसताय् थीथी दलया नेतातय्सं नं भिंतुना देछायादीगु खः ।
