स्यनाच्वंगु लँ याकनं दयेकेत इनाप
येँ महानगरपालिका वडा नं. ३० असंनिसें वंघःतक व वडा नं. २७ न्हाय्कंत्वाः, २८ वडा थाय्मदु, १८ वडा त्यंगःतकया लँ याकनं दयेके माःगु विषययात कयाः शनिवाः छगू सहलह ज्याझ्वः जुल ।
काठमाडौं विकास समूहया संयोजक चिनियामान बज्राचार्यया सभापतित्वय् जूगु ज्याझ्वलय् नेवाः जागरण मञ्चया अध्यक्ष सुजीव बज्राचार्यं लँ दयेकेगु ज्या याकनं महानगरपालिकां यायेमाःगु खँयात कयाः जानकारी बियादिसें उगु लागाया स्थानीय जनतां ल्हाःचिं तयातःगु ज्ञापन पौया सम्बन्धय् जानकारी बियादीगु खः ।
ज्याझ्वलय् येँ महानगरपालिका हनुमानढोका दरवार क्षेत्र संरक्षण कार्यक्रमया प्रमुख हरिकुमार श्रेष्ठं तत्काल जनतायात सुविधा बिइत लँ दयेकेगु ज्या न्ह्याकेत सम्बन्धित प्राविधिकपिन्त निर्देशन बिइगु खँ कनादिल ।
उगु ज्याझ्वलय् मनपाया वरिष्ठ प्राविधिक ई. रोशन शाक्यं भित्री शहर विकासया निंतिं थःपाखें फक्व ज्या यायेगु धयादिल । ज्याझ्वलय् येँ मनपा दलीय संयन्त्रया दुजः विद्यासुन्दर शाक्यं स्थानीय विकासया निंतिं स्थानीय जनतालिसे सहलह यानाः ज्या यायेमाःगु धयादिसें लँ दयेकगु ज्या लिमबाकुसे याकनं यायेमाःगु खँ धयादिल ।
थुकथं हे दलीय संयन्त्रया मेम्ह दुजः उमेश स्थापितं कर्मचारीपिसं नेतातय्सं थें आश्वासन इने मज्यू धासें ३०, २७, २८ व १८ य् लँ दयेकेत कर्मचारीपिसं यायेमाःगु ज्या यायेत इनाप यासें स्थानीय जनताया सःयात नगरपालिकातक थ्यंकेगु बचं बियादिल ।
थुकथं हे उगु ज्याझ्वलय् असन सेवा समितिया पूर्वअध्यक्ष यज्ञरत्न तुलाधर, न्हाय्कंत्वाः झी पुचःया सदस्य सरोज श्रेष्ठ ‘सिम्पू’, नरसिंह टोल सुधार समितिया न्हुच्छे शाक्य, मच्छिन्द्र क्लवया अध्यक्ष जीवेन्द्रलाल कर्माचार्यलिसेंयापिसं लँ दयेकेगु ज्या निला दुने नं मन्ह्यात धाःसा स्थानीयबासीत महानगरपालिकायात दवाव बिइत संघर्ष न्ह्याकेगु बिचाः प्वंकादिल ।
ज्याझ्वलय् २८ वडाया पूर्वअध्यक्ष सुभानकुमार श्रेष्ठ, २७ वडाया पूर्वअध्यक्ष बाबुराजा महर्जनं नं वडा विकासया लागि महानगरपालिकां जनताया सःयात इलय् हे थुइकाः ज्या यायेत सुझाव बियादिल ।
