सुनचाँदी व्यवसायी संघं सभासद् जोशी व मानन्धरयात हन
सुनचाँदी व्यवसायी संघं संघया सल्लाहकार एवम् ८ नं. क्षेत्रया न्हू निर्वाचित जूम्ह सभासद् नविन्द्रराज जोशी व ७ नं. क्षेत्रया न्हू निर्वाचित सभासद् रामवीर मानन्धरयात बिहीवाः छगू ज्याझ्वःया दथुइ हन ।
संघया नायः महेन्द्ररत्न शाक्यं निर्वाचित निम्हं सभासद्पिनिगु सफलताया कामना यासें न्हूगु संविधान इलय् पित बीगु ज्याय् वय्कःपिं निम्हं न्ह्यलुवा जुयाः न्ह्याः वने फयेमा धकाः लसकुस यानादीगु उगु ज्याझ्वलय् नेवाः परम्पराकथं ख्येँय् सगं ब्यूगु खः ।
ज्याझ्वलय् सभासद् नविन्द्रराज जोशीं दच्छिया दुने संविधान, जनमतया कदर व जनतायात सुविधा बीगु खँय् न्ह्यायेगु बचं बियादिल । लिसें वय्कलं वंघः, न्हूसतक लागा सुनचाँदी व्यवसायी लागाकथं नीति तयार यात धाःसा उगु लागाय् विशेष सुरक्षायालिसें थुगु व्यवसायया निंतिं माःगु नीति दयेकेगुली थः न्ह्यचिलेगु बचं नं बियादीगु खः ।
अथेहे मेम्ह सभासद् रामवीर मानन्धरं जनताया निंतिं लः व धः, देय्या निंतिं मूल कानुन संविधान जूगुलिं निगुलिं ज्याय् थःपिं न्ह्यचिलेगु बिचाः प्वंकादिल । वय्कलं नेवाः व्यवसायीतय्गु हकहितया निंतिं थःपिं न्ह्याबलें न्ह्यचिलेत तयार दुगु बचं बियादीगु खः ।
थुगु ज्याझ्वलय् सुनचाँदी व्यवसायी संघया नायः मनकाजी शाक्य, पूर्व सूनचाँदी व्यवासायी संघया नायःपिं निरञ्जनरत्न शाक्य, तेजरत्न शाक्यपिं उपस्थित जुयादीगु खःसा संघया सकल दुजःपिंलिसें प्रतिस्थित व्यक्तिपिं उपस्थित जुयादीगु खः ।
