नेवा: शक्ति प्रदर्शनया नितिं नेवा: एकता दिवस
नेपाल संवत् ११३० थिंलागा: ९ उकथं २०६६ पुष ११ गतेया न्हि नेपा:या इतिहासय् हे अविस्मरणीय घटना जुल । नेपा:या छगू उच्च व सुसंस्कृत राष्ट्रया रुपय् स्थापित जुइधुंकूपिं नेवा:त सत्तापाखें वेदखल जूगु ने.सं. ८८८ सं २४२ दँलिपा वया: स्वनिग:या सकलें तिनिख्य: क्वय् रंगशालय् नेवा: स्वायत्त राज्यया घोषणा जूगु थुगु न्हि ख: । थुकियात संवैधानिक रुपं मान्यता प्राप्त याना: लागू यायेगु ज्या ल्यं हे दनिगु जूसां नेवा:तय् दुने दुगु ३२ गू जातिय मनूतसें नेवा: स्वायत्त राज्यया घोषणा या:गु ख: । थुखुन्हु नेवा:तसें २४२ दँ न्ह्य:निसें क्वचिनात:गु नेपा:या एकात्मक शासन व्यवस्थायात दक्कय् न्हापां अस्वीकार यात । थ्वहे न्हियात लुमंका: नेवा: स्वायत्त राज्य मंका: संघर्ष समितिं दँय्दसं नेवा: एकता दिवस धका: हनावयाच्वंगु दु । थ्वयांल्यू पूच्वय् जूगु नेवा: एकता दिवसय् नेवा:तय् दुने दुपिं सकल जातजातिं नेवा:तय् दुने थजातक्वजात धइगु मदु, सकलें समान ख: धइगु प्रतिवद्धतापौ ब्वना: न्यंकल ।
नेवा:तय् दथुइ गुगु जातीय, दलीय व लागाया विभेद दु, उकियात चीका: नेवा:त सकलें छप्पँ ख: धका: क्यनेगु व सकलें न्ह्या: वना: नेवा: स्वायत्त राज्य प्राप्तिया दिशाय् न्ह्या: वनेगु थौंया आवश्यकता ख: । थ्व स्थितिइ झीपिं सकलें छप्पँ छधी जुया: नेवा: शक्ति प्रर्दशन यायेफत धा:सा जक झीपिं झीगु आज्जु तक थ्यंकेफइ । आ:या संविधानसभाया संरचनां याना: नेवा: स्वायत्त राज्य वइगु खँय् आपा:सिनं शंका प्वंकाच्वंगु दु । तर नेवा:त धइपिं ला पंचायतकालया कालरात्रीया इलय् नं भाषिक संघर्ष व संवतया संघर्षया आन्दोलनय् कुहां वयाच्वपिं जनता ख: । थ्व खँ झीसं लोमंके मज्यू ।
'ल्हा: फयां जक दइगु जूसा झीत मय् अधिकार नं' धका: म्ये हालीपिं न्यनीपिं नेवा:त संविधान सभां धौबजी इनेगु धायेवं ब्वाँय् वनीपिं जुइमज्यू । थ:गु थासं हे संघर्ष, आन्दोलन शक्ति प्रर्दशन यायेमा: । थ्वहे झ्वलय् नेवा: एकता दिवस नेवा:तय्गु शक्ति प्रदर्शनया नितिं छगू त:धंगु अवसर ख: । थ्व अवसर जक मखु, धात्थें हे नेवा: एकता दिवस हनेमा:गु न्हि ख: । वंगु मंसिर ४ गते जूगु चुनावय् नेवा:त हानं थ:थ:गु राजनीतिक दलपाखें वन । चुनावया इलय् थ:थ:गु राजनीतिक दलय् वंगुया अर्थ नेवा:तय्गु दथुइ हानं राजनीतिक विभाजन वल धइगु जुइमखु । नेवा:त धायेवं तुं नेवा: नामं हे व:गु राजनीतिक दलय् सम्मिलित जुइमा: धइगु आग्रह नं सही मखु । नेवा:त राजनैतिक बैचारिक अवस्थाकथं थ:थ:गु राजनीतिक दलय् संग्लन जुयातुं च्वंगु दु । तर गुबले नेवा:तय्गु सवाल पिदनी, उबले राजनीतिक दल त्व:ता: छथाय्हे मुं वयेमा: । थ्वहे वास्तवय् राजनीतिक विभाजनया अन्त्य जूवनी । तर थ:थ:गु कथं न्ह्यायेधुंकूगु जूगुलिं आ: वइगु नेवा: एकता दिवसय् गुगुकथं असर लाकेबी मज्यू ।
नेवा: एकता दिवसय् झीसं धात्थें हे नेवा: जनशक्ति क्यनेफत धा:सा चुनावया माध्यमं 'जिपिं त्यात' धका: च्वनाच्वंपि एकात्मवादीपिनि नितिं त:धंगु धक्का जूवनी । थुकथंया धक्का झीसं बी नं फयेमा: । नेवा:तसहित जनजातित व मधेशी आन्दोलनय् दुपिं याना: पहिचान दयेमा: धइगु खँय् कांग्रेस, एमाले थुज्व:गु त:धंगु दलत नं सहमत जुइधुंकूगु अथेहे विल धा:सा थ:पिनिगु राज्यसत्ता हे खुस्के जुइगु ख:ला धइगु ग्या:चिकु लहिना च्वंगु दु । नेपालय् मनूत जातीय रुपं संगठित जुइगु व उकियात राजनीतिक अभिव्यक्ति बीत राजनीतिक दल चायेका वयेगु ख:सा आ: बैचारिक – राजनैतिक रुपं संगठित याना: थ:पिनि अस्तित्व व वर्चस्व कायम यानात:गु भविष्य मदयेफु धइगु चिन्ता हे नेपालय् एकात्मकवादीतय्गु चिन्ता ख: । अथे जूगुलिं थ्व सवालय् र्इपिं तसकं हे तर्क जक मखु, जातीपातया भूत ख्याना छ्वयेगु कथं हे न्ह्यज्याना च्वंगु दु ।। जाति–जातिया दथुइ ल्वापू जुइ व देय् कुचा दली धइगु हल्ला नं न्यंकल । थ्व सकतां 'प्रोपोगाण्डा वार' अर्थात प्रचार युद्धय् छ्य:गु ल्वाभ:त ख: । धात्थेंगु ल्वाभ: सिकं नं प्रचार युद्धय् छ्यलीगु ल्वाभ: गुलि खतरनाक धका: थुकिं क्यनाव्यूगु दु । गुकी नं राज्यसत्ता व मिडिया थ:गु ल्हातय् दुपिसं हे रजार्इ याइगु खनेदत । अथे जूगुलिं थ्व स्थितियात चिरे यायेत नं नेवा:तसें नेवा: स्वायत्त राज्यया माग यासें नेवा: जनशक्ति प्रर्दशन यायेमा:गु जरुरी जुयाच्वंगु दु । सु चुनावपक्षीत, सु चुनाव विरोधी, सु लोकतन्त्रवादी, सु साम्यवादी सकलें नेवा:त न्हापां ला नेवा: हे ख: । थनया एकात्मक राज्यसत्तापाखें उपेक्षित व पीडित जनसमुदाय हे ख:, उकिं थ:गु स्या: नुग:या स: थनेत नेवा: एकता दिवश आ: वइगु थिंलागा ९ खुन्हुया नितिं तयारी याये ।
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
