येँ महानगरपालिकाया लँ दयेकेगु विषयस स्थनीयवासीया मुँज्या
येँ महानगरपालिका २७, २८, १८ व ३० वडाय् लाःगु लँ दयेकेगु विषययात कयाः मंगलवाः सुथय् थनया असन सेवा समितिइ स्थानीय बासीतय्गु मुँज्या च्वन । येँ महानगरपालिकां ताः ई न्ह्यःनिसें थुगु लागाया लँ दयेकेगु खँ ल्हानाच्वंगु खःसां दयेकेगु ज्या इलय् मयाःगुलिं उगु लागाय् याकनं लँ दयेकेमाःगु विषयलय् सहलह जूगु खः । उगु सहलह मुँज्याय् नेवाः जागरण मञ्चया नायः सुजीव बज्राचार्य, असन सेवा समितिया पुलांम्ह नायः यज्ञरत्न तुलाधर, न्हाय्कंत्वाः झी पुचःया दुजः सरोज श्रेष्ठ ‘सिम्पु’, नघल युवा समूहया संगीता श्रेष्ठलिसें वडाया बासीत मुंगु खः ।
उगु सहलह मुँज्यां २७ वडा न्हाय्कंत्वाःनिसें २८ वडा न्ह्यःखातक व १८ वडा त्यंगःतकया लँ पूर्णरुपं दयेकेगु निंतिं येँ महानगरपालिकायात मंकाःकथं वडाबासीतय्गुपाखें निवेदन बीगु क्वःज्यूगु दु । अथेहे ३० वडा असंनिसें केलत्वाःतक ल्वहतं सीगु निंतिं येँ महानगरपालिकायात इनाप यायेगु खँ नं क्वःज्यूगु दु ।
हस्ताक्षर संकलनलिपा उगु वडाया सरोकारवाला सकल पक्षतय्गु मुँज्या च्वनाः उगु हस्ताक्षरसहितया निवेदन येँ महानगरपालिकाया कार्यकारी अधिकृतयात लःल्हायेगु क्वःज्यूगु दु ।
लुमंकेबहःजू, येँ महानगरपालिकां वंगु येँयाःलिपा हे न्हाय्कंत्वाःनिसें त्यंगःतकया लँ दयेकेगु मौखिक बचं ब्यूगु खः । अथेहे ३० वडाया असंनिसें केलत्वाःतक ल्वहतं सीगु ज्या स्वन्ति लिपा हे यायेगु बचं ब्यूगु खः ।
