पहिचान पक्षधर छथाय् च्वनेमा:

नेपा:या राजनीति आ: पहिचान पक्ष्धर व पहिचानविरोधीया रुपय् स्पष्ट ध्रुवीकरण जुइधुंकूगु दु । थुकी पुलांगु परम्परागत शक्ति ला पहिचान विरोधीत हे ख: । अथे नं इमिसं थ:त न्हू मुद्दाय् नं थ:पिं दुपिं ख: धका: क्यनेत एकल जातीय थासय् बहुजातीय धका: धाररहित पहिचान खँ ल्हाना जूगु दु । अथेजूगुलिं पहिचान व संघीयताया विरोधी सारतत्व घानाजूपिं जूसां रुप पक्षय् इमिसं नं नखरा यानाजूगु दु । थुपिं कांग्रेस व एमाले ख: ।

माओवादी पहिचानसहितया संघीयताया पक्ष व विपक्षय् डोलायमान खनेदु । इमिसं संघीयताया मुद्दायात पुलांपिं नेतातय्‍गु पहलं हे सत्ता व शक्तिकेन्द्रत नाप बार्गेन यायेगु विषय दयेकाच्वंगु दु । अले जनजातिया भोट सालेत नं इमिसं जातीय पहिचान सहितया संघीयताया वकालत याना जूगु दु । थुकथं इपिं सार व रुप निगुलिं पक्षय् बच्छि बच्छि ख: । तर परम्परागत शक्तितसें बांमलाक्क बुके धुंका: इमित थ:गु अडानय् हे च्वना: उकियात हे जनताया दथुइ यकेत व वनेत बाध्यकारी स्थिति नं पिदनाच्वंगु दु । मेखे उपेन्द्र यादवया मधेशी जनअधिकार फोरम, अशोक रार्इया संघीय समाजवादी पार्टीलिसेंया दलत धा:सा संघीयताया मुद्दाय् हे आधारित जुया: गठन जूगु दलत जुल । थुकथं जुसेंलि राप्रपा नेपाल धइगु जुजुवादी दलं नं हिन्दू राष्ट्रया नारा थ्वयेकल व संघीयतायात इन्कार यात । अथेहे तुं चित्रबहादुर केसीया जनमोर्चायात संघीयताविरोधी प्रचारय् छ्‍यल । हानं बर्ह्मूतय्‍गु बाहुल्यता दुगु राष्ट्रिय स्वाभिमान पार्टी व क्षेत्रीतय्‍गु बाहुल्यता दुगु अखण्ड नेपाल पार्टी धइगु नं वल । थुकथं संघीयताया आन्दोलनया विरोधीत नं खडा यात, जुल । थुकथंया स्थितिइ कांग्रेस व एमाले थुज्व:गु त:धंगु दलतसें दथुइ च्वना: भिंसका: जुया: नयेगु लँपु नं चाल । थथेजूगुलिं पहिचानसहितया संघीयताया पक्षधर शक्तित छप्पँ छधी जुया: सडक व सदनय् ल्वायेफत धा:सा थ:गु पक्षय् स्थिति ब्वलंके फइ । भारतय् स्वयेगु ख:सा स्वतन्त्रता व:गु १९४७ स ख:सा आ: सन् २०१३ स तिनि तेलंगना राज्य बने जुल । उकिं आ: म्होतिं निं झीसं संघीयताया खाता जक चायेके फत धा:सां त:धंगु जुइ । थ्व स्थिति ला दहे दु । थ्वहे तकं मवइगु कथं २०४७ सालया संविधान हे टालटुल याना: जारी यायेगु गुगु षडयन्त्र जुयाच्वन, उकियात पनेमा: । २०४७ सालया संविधानयात उत्कृष्ट धका: भजनगान जूगु व उगु भजनगानया प्रभावय् लानाच्वंपिं नं आपालं दनि । वास्तवय् २०४७ सालया संविधान व्यक्तिगत स्वतन्त्रताया दृष्टिकोणं बांला:गु हे ख: । न्हापा पंचायतकालय् पंच हे जुया: जक राज्यया निकायस प्रवेश जुइ दइगुया थासय् थ:थ:गु स्वतन्त्र विचारधारा ज्वना: नं चुनाव ल्वायेगु व जनताया मत कया: त्याकेफुगु धाल । तर उबलय्‍ हे बर्ह्मूवादीतसें जातीय खँ वइ धका: जातजातिया नामं दल चायेके मदइगु व्यवस्था यात ।

More Stories Like this