अदालतया आदेश न्यनेमखु : माओवादी
नेकपा–माओवादीं सहमति अःखः जबरजस्ती तरिकापाखें चुनाव यायेगु कुतः याःगु सरकार व प्यंगू दलीय सिण्डिकेटया हुनिं आःया समस्या ब्वलंगु न्ह्यःथना यातायात बन्द लित कायेत सर्वोच्चं ब्यूगु आदेश मन्यनेगु घोषणा याःगु दु ।
थौं पार्टी ज्याकू बुद्धनगरय् ग्वसाः ग्वःगु पत्रकार सम्मेलनय् पार्टी नायः मोहन बैद्यं असंवैधानिक पलाः विरुद्ध लाःगु झिंन्हय्गू रिटत खारेज यायेगु, रेग्मी विरुद्ध लाःगु मुद्दा चीकु चिकलं तुं याःगु थेंज्याःगु प्रकरणं अदालत निष्पक्ष व स्वतन्त्र जुइमफुगुलिं थुकिया आदेश न्यनेत बाध्य मजुइगु धयादीगु खः ।
वय्कलं आःया स्थितिइ थज्याःगु अदालतयात थःपिंसं स्वीकार नापं मयायेगु धयादीगु खः । वय्कलं निर्वाचन बहिष्कार आन्दोलनय् जनतां तःधंगु ग्वाहालि याःगु धयादिसें अझ नं सहमतिया नितिं दवाब बीत जनतायात इनाप यानादीगु दु ।
वय्कलं एकीकृत माओवादीया नायः पुष्पकमल दाहालं जनता विरुद्ध अपराध याःगु व उकिं आः दाहालयात समस्या जुयाच्वंगु धयादिसें दाहालया हत्या यायेत स्वःगु धइगु खँय् छु नं सत्यता मदुगु स्पष्ट यानादीगु दु ।
नायः बैद्यं आःया संविधानसभाया चुनाव जू हे जूसां नं थुकिं जनताया संविधान मदयेकीगु धयादिसें जनता सचेत जुइमाःगु धयादीगु दु । थ्वहे दथुइ, ज्याकू ई क्वचायेधुंकाः सर्वोच्चया पौ ज्वना वःपिं कर्मचारीतय्त माओवादीं पौ मकासें लिछ्वःगु खः ।
डेमोक्रेटिक लयर्स एशोसिएसनं दायर याःगु रिटय् सुनुवाई यानाः सर्वोच्चं म्हिगः बन्द लित कायेत स्वीस्वंगू दलीय मोर्चायात उजं ब्यूगु खः । लिपांगु इलय् न्यायिक निरुपण यायेमफुगु सर्वोच्चं राजनीतिक बिषयसं ल्हाः तःगु न्ह्यःथना बिरोध यानाः वयाच्वंगु दु ।
