शंखधर दिवस हनीगु
नेपाल संवत् न्हूदँ राष्ट्रिय समारोह समिति – ११३४ पाखें थ्वहे कछलाथ्वः दशमि (कार्तिक २६ गते) कुन्हु शंखधर दिवस हनीगु जूगु दु । समारोह समितिया वंगु बिहीवाः न्हूदँया र्याली व सभायात कयाः समीक्षा मुँज्या च्वंगु खःसा उगु मुँज्यां शंखधर दिवस हनेगु निर्णय याःगु खः । थुगु दिवस हनेगु ज्या समारोह समितिया नायः डा. चुन्दा बज्राचार्य, दुजःपिं पञ्चनारायण महर्जन, नानिहेरा महर्जनलिसें समितिया दुजःपिं दुगु उपसमितिं यायेत्यंगु खः ।
उपसमितिं दशमि खुन्हु नेपाल संवत्नाप ऐतिहासिक महत्वदुगु थाय् लखुतीर्थय् सुथसिया ७:००–८:०० तक सरसफाई व ८:०० निसें ९:०० ताःतक ज्याझ्वः यायेत्यंगु खः ।
उगु ज्याझ्वलय् सकल नेपाल संवत् ह्यमिपिन्त ब्वति कायेत समितिं इनाप याःगु दु ।
शंखधर साख्वाःयात तत्कालीन प्रधानमन्त्री कृष्णप्रसाद भट्टराईया पालय् ने.सं. ११२० कछलाथ्वः दशमी खुन्हु राष्ट्रिय विभूति घोषणा याःगु न्हियात दँय्दसं शंखधर दिवसकथं हनेगु यानावयाच्वंगु दु ।
