३३ दलीय मोर्चाया आन्दोलनया ज्याझ्वः संशोधन
संविधानसभा चुनाव बहिष्कारया रणनीति दयेकूगु नेकपा–माओवादी नेतृत्वया स्वीस्वंगू दलीय मोर्चां आन्दोलनया ज्याझ्वः संशोधन याःगु दु ।
नेकपा–माओवादीया मू ज्याकू बुद्धनगरय् थौं च्वंगु मोर्चाया बैठकं आन्दोलनया ज्याझ्वः परिमार्जन यानाः कन्हय् आमहड्ताल यायेगु व ल्यं दुगु गुन्हु यातायात जक बन्द यायेगु निर्णय याःगु खः ।
बैठकं कन्हय्या आमहड्तालयात कडा पूर्वक यायेगु व ल्यं दुगु गुन्हु नीप्यघौ तक यातायात बन्द यायेगु निर्णय याःगु खः । आन्दोलनया दथुइ एम्बुलेन्स, मानव अधिकारवादी, कूटनीतिक नियोग, खानेपानी, शव बाहन लगायतया साधनत धाःसा चले याके बीगु मोर्चां जानकारी ब्यूगु खः ।
बैठकलिपा ग्वसाः ग्वःगु पत्रकार सम्मेलनय् नेकपा–माओवादीया छ्याञ्जे लिसे स्वीस्वंगू दलीय मोर्चाया कजि देव गुरुङं थःपिनिगु आन्दोलनय् दमन याःसा अनंनिसें सरकारया पराजय शुरु जुइगु ख्याच्वः नापं बियादीगु खः ।
सरकार व प्यंगू दलं सहमतिया लँपुयात हेपय् यानाः निर्वाचन यायेत स्वःगुलिं समस्या वःगु धयादिसें वय्कलं देय्यात निकास बीगु नितिं राष्ट्रिय सहमतिया बिकल्प मदुगु स्पष्ट यानादीगु खः ।
छ्याञ्जे गुरुङं मखुगु मुद्दा बियाः देय्व्यापी रुपं थःगु पार्टीया कार्यकर्तात दथुइ धरपकड यानाः ज्वंगु न्ह्यःथना याकनं त्वःतेत नं माग यानादीगु दु ।
