बिबिधताया दुने एकताया प्रशिक्षण हलिं नेवाः दबूपाखें
हलिं नेवाः दबू केन्द्रीय ज्याकू संयुक्त राज्य अमेरिका व हलिं नेवाः दबू नेपाः देय् मूकवःया ग्वसालय् बिबिधताया दुने एकताया विषयस प्रशिक्षण ज्याझ्वः शनिवाः कोपुण्डोलया सातोआकि भवनय् क्वचागु दु ।
नेपाः देलय् दुगू विविधतायात स्रोत कथं छ्यलेगु तातुना थुगू प्रशिक्षण जुगू खः । नापं ज्याझ्वः नं बिबिधता धाइगु स्रोत खः समस्या मखु धाइगु सन्देश नं बिइगु दु । निगू चरणय् न्ह्याःगु थुगू प्रशिक्षण हलिं नेवाः दबूया न्वकू भाजु दयारत्न शाक्य अमेरिका पाखें प्रशिक्षण बिइगु ज्या यानाः दिगु खः । प्रशिक्षार्थी कथं डा. सत्यमोहन जोशी लगायत नेवाः न्ह्यलुवातय्गु ब्वति दुगू खः ।
अथेहे उगु ज्याझ्वलय् रास जोशीया नेपालभासाया ऐतिहासिक उपन्यास न्ह्यलं ल्हाय् मफूगु सत्य नांया सफू नं न्वकू भाजु दयारत्न शाक्य पाखें उलेज्या जुगू खः । मुपाहाँ कथं झायादिम्ह नेपालभासा एकेडेमीया चान्सलर्र डा. सत्यमोहन जोशीं त्वाः देवाय् मत च्याकाः उलेज्या यानाः दिगु खः । पाहाँ कथं प्रा. माणिकलाल श्रेष्ठया ब्वति दुगू खः
हलिं नेवाः दबू नेपाःया नायः भाजु नरेन्द्र भक्त हाडाया नायसुई न्ह्यागु थुगू ज्याझ्वलय् लसकुस न्वचू भाजु पुष्कर माथेमा बियादिगु खः धाःसा डा महेशमान श्रेष्ठ, न्हूदँ समारोह समिति ११३४या नायः मय्जु चुन्दा बज्राचार्य, भाजु गणेशराम लाछि, शाक्य सुरेन व थीथी व्यक्तितय्सं थःथःगु बिचाः प्वंकादीगु खः ।
