बिराट भर्सेज तःमुँज्या ?
सुनिल बोहजू, तँचो-२, ख्वप
नेपालमण्डल दुनेय छगू जिल्ला ख्वपय् मोहनिया लसताय् निगू तः तःधंगु साहित्यिक ज्याझ्वःत न्ह्याइगु झी सकसिनं खना वयाच्वनागु खँ हे खः । तर थ्व निगुलिं ज्याझ्वः वहे इलय् ( कौलाथ्व द्वादशि व त्रयोदशी ) निन्हु हे जुयाच्वंगु धाःसा झी थेंज्याःपिं नेपाललाषा ह्यमिपिनि निंतिं तस्कं हे मछिंगु ज्या जुल । छखे नेपाल मजदुर किसान पार्टीलिसें सम्वन्धित नेपालभाषा साहित्य तःमुँज्या जुइसा मेखे स्वीस्वंगु थीथी खलः पुचः मंका यानाः नीस्वंगु विराट गुथिया थःगु हे सम्मेलन न्ह्यानाच्वनी । उकिं यानाः जिपिं थेंज्याःपिं तःमुँज्याय् नं भरोसा दुपिं तर भाषा जाति प्रति नं उलि हे सम्वेदनशील जुयाच्वनापिं साहित्य ह्यःमित द्याइगु जुल ।
तःमुँज्यां भाषा मस्वसें राजनीतियात जक अप्वः बः बियाच्वंगु खनेदुसा भाषा संरक्षणया ज्याय् हे जक सीमित जुयाः विराटं थःगु पहः क्यनाच्वंगु दु । उकिं निगू संस्थां निखे थःपिनि ज्याझ्वः यायेगुयात स्वीनिदँ स्वदँ तक नं निरन्तरता बियाच्वंगु दु । थुकथं थीथी कथं थःपिनि हे जक गुणगान यानाच्वंगुलिं यानाः सर्वसाधारणयात धाःसा अलमल यानाबिउगु दु । उकिं नं भाषाप्रेमितय्त छप्पँ छधि यायेगु निंतिं झी नेवाः नेतातय्सं छगू हे इलय् ज्याझ्वः यायेगु प्रबृत्ति त्वताः अलग्ग अलग्ग हे इलय् ज्याझ्वः यानाः भाषा उन्नतिया नितिं सरकारयात दवाव बिइफत धाःसा बांलाइ ।
जनतां मयेकं मयेकं चले यायेत स्वत धाःसा थज्याःगु तःजिगु साहित्यिक ज्याझ्वःया भविश्यय् तना नं वनेफु । निगू थासय् अलग अलग इलय् ज्याझ्वः याये फतधाःसा थज्याःगु ज्याझ्वःया महत्व अप्वया झी नेवाःतय् सिद्धि दयावइ । मखुत धाःसा द्वहँ ल्वना घाँय् चुंदं धइथें झी झी ल्वना मेपिंत फाइदा जुइसा नेवाः व नेपालभाषा ह्यमितय्त सदां द्यापं हे जक लाइ । उकिं नं फुसा एकता यानाः ज्याझवः यायेमाल । मखुत धाःसा अलग्ग अलग्ग ई व थासय् यायेमाल । थुगुसी इन्द्रेणी सांस्कृतिक समाजपाखें वइगु १६ गते सनिवाः यायेगु यानाः थःपिनि ज्याझ्वः क्वछिगु व सांस्कृतिक ज्याझ्वः जूसां विराटं लिछ्यागु पाय्छि हे धायेमाः ।
