इटहरीइ म्हपुजा प्रशिक्षण
नेवाः तय्गु बिस्कं महत्वं जाःगु तःजिगु नखः 'म्हपुजा' स्वनिगलं पिने नं ब्यवहारय् छ्यलेत व उकीया बारे अप्वःसीकेत शुक्रवाः इटहरीइ छगू प्रशिक्षण ज्याझ्वः जुल ।
नेवाः पुचः, इटहरीया ग्वसालय् थनया नेपाः बहुउद्देश्यीय सहकारी छेँय् उगु ज्याझ्वः जूगु खः । प्रशिक्षक कथं झायादीम्ह मूपाहाँ संस्कृतिविद् भाजु गणेशराम लाछिं त्वाःदेवाय् मत च्याकाः ज्याझ्वःया उलेज्या यानादीगु खः ।
भाजु लाछिं म्हपुजा विधिबारे छगू कार्यपत्र हे न्ह्यब्वसें प्रशिक्षण बियादीगु खः । नेवाः जुयाःया नातां थःथःगु कथं नेवाःतय् तःजिगु नखः म्हपुजा सकसिनं थःथःगु छेँय् म्हपुजा यानादीत नं इनाप यानादिल । ज्याझ्वःलिपा म्हपुजा विधिबारे अन्तरक्रिया नं जूगु खः । उगु अन्तरक्रियाय् न्यंगु न्ह्यसःया लिसः बिसें मूपाहाँ व प्रशिक्षक भाजु लाछिं म्हपुजा व मण्दःया बारे नं ध्वाथुइकादीगु खः ।
इटहरीया जःखः च्वंगु थाय्त हासपोसा, पकली, झुम्का, इनरुवालिसें मोरङ्ग जिल्लाया सुन्दरपुर व पथरीइच्वंगु थीथी खलः/पुचःया थ्यंमथ्यं निसःम्हेसिनं उगु प्रशिक्षणय् ब्वतिकयादीगु खः ।
म्हो हे जक छेँय् म्हपुजा याइगु जूगुलिं नेवाः पुचः, इटहरीं थ्वहे वइगु नेपाल संवत् ११३४ न्हूदँ कुन्हु नेपाः बहुउद्देश्यीय सहकारी छेँय् हे मंकाः म्हपुजा याइगु जूगु दु । थ्यंमथ्यं सच्छिम्हेसित 'मंकाः म्हपुजा' यायेगु पुचःया नायः सोमबहादुर श्रेष्ठं जानकारी बियादिल ।
ज्याझ्वलय् पुचःया न्वकू देवनारायण श्रेष्ठं लसकुस यानादीगु खःसा नेवाः देय् दबूया केन्द्रीय दुजः भाजु पूर्णकृष्ण श्रेष्ठं संस्कृतिविद् भाजु गणेशराम लाछिजुया योगदानयात कदर यासें नेवाः पुचः, इटहरीं 'भाषाथुवाः'या उपाधिं विभूषित यायेमाःगु धयादिल ।
नेवाः पुचः, इटहरीया नायः भाजु सोमबहादुर श्रेष्ठया नायःसुइ न्ह्याःगु उग ज्याझ्वलय् पुचःया मिसा खलःया नकिं मय्जु सिला श्रेष्ठंनं नुगः खँ तयादीगु खःसा पुचःया छ्याञ्जे लक्ष्मीप्रकाश श्रेष्ठं न्ह्याकादीगु खः ।
News Location:
More Stories Like this
बाघ भैरवया भजन म्येँया म्यूजिक भिडियो सार्वजनिक दाफा भजन म्येँ नं आः म्यूजिक भिडियोय् श्रीच्छा प्रधानं त्याकल 'मिस नेपाल वर्ल्ड २०२३' या उपाधि नेपालभाषाया न्हूगु म्युूजिक भिडियो “याकः मिसाया छेँ खः झीगु किपू देयया प्यंगः थां” सार्वजनिक मिस नेवाः जिगु लुमन्ति व अनुभव
