उम्मेदवार दथुइ द्यनाच्वंगु इलय् आक्रमण
नेकपा–माओवादी व संघीय लिम्बुवानया कार्यकर्तातय्सं एकीकृत नेकपा माओवादीया उम्मेदवार दथुइ द्यनाच्वंगु इलय् आक्रमण याःगु दु ।
ताप्लेजुङ्ग निर्वाचन क्षेत्र नं. १ या उम्मेदवार सञ्चपाल मादेनयात सुथ न्हापां खाताय् हे आक्रमण जूगु खः । थौं सुथय् थ्यंमथ्यं स्वताः इलय् जिल्लाया मेले गाविस वडा नं. २ सं सुरक्षाय् दुपिं प्रहरीया ल्वाभः लाकाः कयाः नेकपा–माओवादी व लिम्बुवानया कार्यकर्तातय्सं द्यनाच्वंम्ह उम्मेदवार मादेनलिसे छगू दर्जन नेता–कार्यकर्तादथुइ आक्रमण याःगु खः ।
आक्रमणपाखें उम्मेदवार मादेनया स्थिति तच्वःगु एकीकृत माओवादीया ताप्लेजुङ जिल्ला ज्याकू छ्याञ्जे सागरमणी गौतमं न्ह्यःथनादीगु खः । उम्मेदवारया सुरक्षाय् न्याम्ह प्रहरी दुगु खँ न्ह्यःथनादिसें उम्मेदवार मादेनलिसेया दर्जन कार्यकर्ता घाःपाः जूगु गौतमं जानकारी ब्यूगु खः ।
उम्मेदवार मादेनलिसेया एकीकृत माओवादी कार्यकर्ता चुनावी अभियानया झ्वलय् मेले गाविसय् थ्यंगु खः ।
